.jpg)
സംഘപരിവാറിന്റെ തീവ്ര വര്ഗീയതയുടെ മുഖമായി ജ്യോതി ശര്മ, കന്യാസ്ത്രീകളുടെ മുഖം അടിച്ചുതകര്ക്കുമെന്ന് ഭീഷണി, പശുക്കടത്തും മതംമാറ്റവും നിരീക്ഷിക്കാന് പ്രത്യേക സംഘങ്ങള്
ഛത്തീസ്ഗഢിലെ ദുര്ഗ് റെയില്വേ സ്റ്റേഷനില് ജൂലൈ 26-ന് നടന്ന ഒരു സംഭവത്തില്, കേരളത്തില് നിന്നുള്ള രണ്ട് കത്തോലിക്കാ കന്യാസ്ത്രീകളായ സിസ്റ്റര് പ്രീതി മേരി, സിസ്റ്റര് വന്ദന ഫ്രാന്സിസ് എന്നിവര്ക്കെതിരെയാണ് ഈ ഭീഷണി ഉയര്ന്നത്.
ന്യൂഡല്ഹി: മലയാളി കന്യാസ്ത്രീകളെ ഛത്തീസ്ഗഢില്വെച്ച് അറസ്റ്റ് ചെയ്ത സംഭവത്തില് വിവാദം തുടരുകയാണ്. മനുഷ്യക്കടത്തും മതം മാറ്റവും ഉള്പ്പെടെ കടുത്ത വകുപ്പുകള് ചുമത്തി അറസ്റ്റ് ചെയ്ത കന്യാസ്ത്രീകളെ ബജ്രംഗ് ദളിന്റെ നേതൃത്വത്തിലുള്ള സംഘം ഭീഷണിപ്പെടുത്തുകയും ചെയ്തു. ഇവര്ക്കൊപ്പമുണ്ടായിരുന്നയാളെ മര്ദ്ദിക്കുന്നതും മുഖത്തടിക്കുന്നതുമായ ദൃശ്യങ്ങളും പുറത്തുവന്നിട്ടുണ്ട്.
tRootC1469263">ഛത്തീസ്ഗഢിലെ ദുര്ഗ് റെയില്വേ സ്റ്റേഷനില് ജൂലൈ 26-ന് നടന്ന ഒരു സംഭവത്തില്, കേരളത്തില് നിന്നുള്ള രണ്ട് കത്തോലിക്കാ കന്യാസ്ത്രീകളായ സിസ്റ്റര് പ്രീതി മേരി, സിസ്റ്റര് വന്ദന ഫ്രാന്സിസ് എന്നിവര്ക്കെതിരെയാണ് ഈ ഭീഷണി ഉയര്ന്നത്.
തൊഴില് അവസരങ്ങള്ക്കായി നാരായണപൂര് ജില്ലയില് നിന്നുള്ള മൂന്ന് യുവതികളെ ആഗ്രയിലേക്ക് കൊണ്ടുപോകുന്നതിനിടെയാണ് ഇവര് പോലീസ് കസ്റ്റഡിയില് എടുക്കപ്പെട്ടത്. കന്യാസ്ത്രീകളെ തടയുകയും ഭീഷണി മുഴക്കുകയും ചെയ്തവരില് പ്രധാനിയാണ് സംഘപരിവാര് സംഘടന അംഗമായ ജ്യോതി ശര്മ.
വൈറലായ വീഡിയോയില്, ബജ്റംഗ് ദള് പ്രവര്ത്തകയായ ജ്യോതി ശര്മ്മ, കന്യാസ്ത്രീകളോട് മുഖം ഞാന് തകര്ക്കും എന്ന് ഭീഷണിപ്പെടുത്തുന്നത് കാണാം. കന്യാസ്ത്രീകളുടെ ബാഗില് ബൈബിള്, ഒരു ഫോട്ടോ, എടിഎം കാര്ഡ്, പാസ്റ്റര്മാരുടെ ഫോണ് നമ്പറുകള് എന്നിവ അടങ്ങിയ ഒരു ഡയറി കണ്ടെത്തിയതിനെ തുടര്ന്നാണ് ഭീഷണി.
നാരായണപൂര് ജില്ലയില് നിന്നുള്ള 18-നും 19-നും ഇടയില് പ്രായമുള്ള മൂന്ന് യുവതികളെ ആഗ്രയിലെ ഒരു കോണ്വെന്റില് അടുക്കള സഹായികളായി ജോലി വാഗ്ദാനം ചെയ്ത് കൊണ്ടുപോകുകയായിരുന്നുവെന്നാണ് റെയ്പൂര് ആര്ച്ച് ഡയോസിസിന്റെ വികാര് ജനറല് ഫാദര് സെബാസ്റ്റ്യന് പൂമറ്റം വ്യക്തമാക്കിയത്. എന്നാല്, ബജ്റംഗ് ദള് പ്രവര്ത്തകരുടെ പ്രതിഷേധത്തെ തുടര്ന്ന്, പോലീസ് കന്യാസ്ത്രീകളെയും അവരോടൊപ്പം ഉണ്ടായിരുന്ന യുവാവ് സുഖ്മാന് മാണ്ഡവിയെയും അറസ്റ്റ് ചെയ്തു.
ബജ്റംഗ് ദള് പ്രവര്ത്തകര് റെയില്വേ സ്റ്റേഷനില് പ്രതിഷേധിച്ച്, പോലീസിനെ സമ്മര്ദ്ദത്തിലാക്കിയാണ് എഫ്ഐആര് രജിസ്റ്റര് ചെയ്യിച്ചതായി റിപ്പോര്ട്ടുകള് പറയുന്നു. പോലീസിന് മുന്നില്വെച്ചും ജ്യോതി ശര്മയും കൂട്ടാളികളും അറസ്റ്റിലായവരെ കൈയ്യേറ്റം ചെയ്യുന്നത് കാണാം.
2021-ല് ഉത്തര്പ്രദേശിലെ ഝാന്സി റെയില്വേ സ്റ്റേഷനിലും സമാനമായ ഒരു സംഭവം നടന്നിരുന്നു. അന്ന് ബജ്റംഗ് ദള് പ്രവര്ത്തകര് രണ്ട് കന്യാസ്ത്രീകളെയും രണ്ട് പോസ്റ്റുലന്റുകളെയും മതപരിവര്ത്തന ആരോപണത്തില് ആക്രമിച്ചു. എന്നാല്, ആ സംഭവത്തില് പോലീസ് വേഗത്തില് ഇടപെട്ട് അവരെ മോചിപ്പിച്ചിരുന്നു.
ഉത്തരേന്ത്യയിലെ ചില പ്രദേശങ്ങളില് ക്രൈസ്തവ വിശ്വാസികള്ക്കെതിരെ വര്ദ്ധിച്ചുവരുന്ന ആക്രമണങ്ങളുടെ ഭാഗമാണ് ഇപ്പോഴത്തെ സംഭവമെന്ന് വിമര്ശകര് ചൂണ്ടിക്കാട്ടുന്നു.
ജ്യോതി ശര്മ, വിശ്വ ഹിന്ദു പരിഷത്തിന്റെ യുവജന വിഭാഗമായ ബജ്റംഗ് ദളിന്റെ പ്രാദേശിക നേതൃത്വത്തില് സജീവമാണ്. ജ്യോതി ശര്മയുടെ പ്രവര്ത്തനങ്ങള് പലപ്പോഴും ആക്രമണോത്സുകവും വിവാദപരവുമാണ്. മുന്പ്, ഒരു പാസ്റ്ററെ ശാരീരികമായി ആക്രമിച്ചതായി ആരോപണമുണ്ടായിരുന്നു, എന്നാല് ഇതിനെതിരെ ശക്തമായ നടപടികള് ഉണ്ടായില്ല. പശുക്കടത്തും മതംമാറ്റവുമെല്ലാം നിരീക്ഷിക്കാനെന്ന പേരിലാണ് ജ്യോതി ഉള്പ്പെടെയുള്ളവര് പ്രവര്ത്തിക്കുന്നത്.