ഗള്‍ഫ് രാജ്യങ്ങള്‍ പണം നല്‍കി താരങ്ങളെ ഇറക്കുന്നു, ഏഷ്യന്‍ ഗെയിംസില്‍ ആഫ്രിക്കന്‍ അത്ലറ്റുകളുടെ തേരോട്ടം, ഇന്ത്യയ്ക്ക് പല ഇനങ്ങളിലും സ്വര്‍ണം ഉള്‍പ്പെടെ നഷ്ടം

ന്യൂഡല്‍ഹി: ജപ്പാനിലെ നാഗോയയില്‍ നടന്നുകൊണ്ടിരിക്കുന്ന ഏഷ്യന്‍ ഗെയിംസില്‍ ട്രാക്ക് ആന്‍ഡ് ഫീല്‍ഡ് മത്സരങ്ങളില്‍ ആഫ്രിക്കന്‍ താരങ്ങളുടെ മേല്‍ക്കൈ. ഇന്ത്യ ഉള്‍പ്പെടെയുള്ള രാജ്യങ്ങളലെ അത്‌ലറ്റുകളെ ബഹുദൂരം പിന്നിലാക്കിയാണ് ആഫ്രിക്കന്‍ അത്‌ലറ്റുകള്‍ ട്രാക്ക് വാഴുന്നത്.

ബഹ്റൈന്‍ ആണ് ആഫ്രിക്കന്‍ അത്‌ലറ്റുകളെ കൂടുതലായി രംഗത്തിറക്കുന്നത്. എത്യോപ്യക്കാരനായ ബിര്‍ഹാനു ബാലേവ് പുരുഷന്മാരുടെ 10,000 മീറ്ററില്‍ സ്വര്‍ണം നേടിയപ്പോള്‍ രണ്ടാമതായത് ഇന്ത്യയുടെ ഗുല്‍വീര്‍ സിങ്ങാണ്. സ്ത്രീകളുടെ 10,000 മീറ്ററിലും മിക്‌സഡ് റിലേയിലും സമാനമായ കഥതന്നെ.

ഇന്ത്യന്‍ എക്‌സ്പ്രസ് റിപ്പോര്‍ട്ട് ചെയ്തതുപോലെ, പുരുഷന്മാരുടെ 5,000 മീറ്ററിന്റെ ഓള്‍-ടൈം ഏഷ്യന്‍ ടോപ്പ് 10 ലിസ്റ്റില്‍ എട്ട് പേര്‍ ആഫ്രിക്കന്‍ വംശജരാണ്. ഏഷ്യക്കാര്‍ രണ്ടു പേര്‍ മാത്രം. സ്ത്രീകളുടെ 3,000 മീറ്റര്‍ സ്റ്റീപിള്‍ചേസില്‍ പാരുള്‍ ചൗധരിയാണ് ഒരേയൊരു ഏഷ്യക്കാരി. ബാക്കി നാല് പേരും ബഹ്റൈന്‍, കസാഖ്സ്ഥാന്‍ എന്നിവയ്ക്ക് വേണ്ടി മത്സരിക്കുന്ന ആഫ്രിക്കന്‍ താരങ്ങള്‍.

ഇത് പുതിയ പ്രതിഭാസമല്ല. 2006ലെ ദോഹ ഏഷ്യന്‍ ഗെയിംസ് മുതല്‍ ഖത്തര്‍, ബഹ്റൈന്‍ പോലുള്ള സമ്പന്ന ഗള്‍ഫ് രാജ്യങ്ങള്‍ കെനിയ, എത്യോപ്യ, നൈജീരിയ, സുഡാന്‍ തുടങ്ങിയ രാജ്യങ്ങളില്‍ നിന്ന് അത്ലറ്റുകളെ ഇറക്കുമതി ചെയ്യാന്‍ തുടങ്ങിയിരുന്നു. കുടുംബത്തിന് നല്ല ജീവിതസാഹചര്യം, പുതിയ വീട്, കാര്‍, പരിശീലന സൗകര്യം ഇവ വാഗ്ദാനം ചെയ്താണ് അവരെ എത്തിക്കുന്നത്.

2012-2016 കാലഘട്ടത്തില്‍ ബഹ്റൈന്‍ മാത്രം കെനിയയില്‍ നിന്ന് 18 പേരെയും എത്യോപ്യയില്‍ നിന്ന് 17 പേരെയും മൊറോക്കോ, നൈജീരിയ എന്നിവിടങ്ങളില്‍ നിന്നും താരങ്ങളെ കൊണ്ടുവന്നു. ബഹ്റൈന്റെ അത്ലറ്റിക്‌സ് മെഡല്‍ എണ്ണം 2010-ല്‍ 9-ല്‍ നിന്ന് 2014-ല്‍ 19 (9 സ്വര്‍ണം) ആയി ഉയര്‍ന്നു. 2018-ല്‍ 26 (12 സ്വര്‍ണം), 2023-ല്‍ 16 (10 സ്വര്‍ണം) ആയും ഉയര്‍ന്നു. 2018 ജക്കാര്‍ത്തയില്‍ ബഹ്റൈന്റെ 10 വ്യക്തിഗത സ്വര്‍ണങ്ങളും ആഫ്രിക്കന്‍ വംശജരുടെ വകയായിരുന്നു. ദുതി ചന്ദ്, ഹിമ ദാസ്, സുധ സിംഗ്, മുഹമ്മദ് അനസ് തുടങ്ങിയ ഇന്ത്യക്കാര്‍ക്ക് സില്‍വറില്‍ തൃപ്തിപ്പെടേണ്ടി വന്നു. ആഫ്രിക്കന്‍ വംശജരായ താരങ്ങള്‍ മത്സരിക്കാന്‍ ഇല്ലായിരുന്നെങ്കില്‍ ഇന്ത്യ അത്ലറ്റിക്‌സിന് കിട്ടേണ്ടിയിരുന്ന സ്വര്‍ണമായിരുന്നു ഇവയൊക്കെ.

ദീര്‍ഘദൂര ഓട്ടം ഇന്ത്യയ്ക്ക് ഏറെ പ്രതീക്ഷയുള്ള മേഖലയാണ്. ഗുല്‍വീര്‍, അവിനാഷ് സാബ്ലെ, പാരുള്‍ ചൗധരി തുടങ്ങിയവ ലോകനിലവാരത്തിലുള്ള അത്‌ലറ്റുകള്‍ വളര്‍ന്നുവന്നു. എന്നാല്‍, ഏഷ്യന്‍ ഗെയിംസില്‍ പോലും അവര്‍ക്ക് ഒന്നാമതെത്താന്‍ സാധിക്കുന്നില്ല. 2023-ല്‍ എഎഫ്‌ഐ പ്രസിഡന്റ് അദില്ലെ സുമരിവാല്ല പറഞ്ഞത്, ആഫ്രിക്കന്‍ താരങ്ങള്‍ ഇല്ലായിരുന്നെങ്കില്‍ ഇന്ത്യയ്ക്ക് കൂടുതല്‍ മെഡലുകള്‍ ലഭിക്കുമായിരുന്നു എന്നാണ്. ഏഷ്യന്‍ മത്സരങ്ങളില്‍ പോലും ഏഷ്യക്കാരുടെ അവസരങ്ങള്‍ ചുരുങ്ങുകയാണ്.

ഇത് കേവലം മത്സര നിലവാരം ഉയര്‍ത്തുന്നതല്ല. ഏഷ്യന്‍ ഗെയിംസിന്റെ അടിസ്ഥാന ലക്ഷ്യമായ ഏഷ്യന്‍ രാജ്യങ്ങളിലെ താരങ്ങളുടെ കഴിവ് പ്രകടിപ്പിക്കുക എന്ന ആശയം തന്നെ ദുര്‍ബലമാക്കുന്നു. നിയമപ്രകാരമാണ് താരങ്ങളെത്തുന്നത് എന്നാണ് ഗള്‍ഫ് രാജ്യങ്ങള്‍ പറയുന്നത്. ആഫ്രിക്കന്‍ താരങ്ങള്‍ക്ക് അവസരം ലഭിക്കുന്നത് നല്ലതുതന്നെ, പക്ഷേ ഏഷ്യന്‍ ഭൂഖണ്ഡ മത്സരത്തില്‍ അവരെ ഏഷ്യക്കാര്‍ ആയി അവതരിപ്പിക്കുന്നത് അസ്വാഭാവികമാണ്.

വേള്‍ഡ് അത്ലറ്റിക്‌സ് കൂടുതല്‍ കര്‍ശനമായ നിയമങ്ങള്‍ കൊണ്ടുവരണമെന്ന ആവശ്യം ഉയര്‍ന്നിട്ടുണ്ട്. ഏഷ്യന്‍ ഗെയിംസ് പോലുള്ള ഭൂഖണ്ഡ മത്സരങ്ങളില്‍ ജന്മദേശം അല്ലാത്ത താരങ്ങള്‍ക്ക് പങ്കാളിത്തം നിയന്ത്രിക്കുകയോ, ദീര്‍ഘകാല റെസിഡന്‍സി നിര്‍ബന്ധമാക്കുകയോ ചെയ്യണം. ഒളിമ്പിക്സ് പോലുള്ള ആഗോള മത്സരങ്ങളില്‍ ഇത് സ്വീകാര്യമായേക്കാം, പക്ഷേ ഏഷ്യന്‍ ഗെയിംസില്‍ ഇത് അനുവദിക്കുന്നതിന് നിയമം കര്‍ശനമാക്കണം.