.jpg)
വനിതാ സിപിഒ റാങ്ക് ലിസ്റ്റ് കാലാവധി ഇന്ന് തീരും ; പരമാവധി നിയമനം ആവശ്യപ്പെട്ടുള്ള സമരം തുടരുന്നു
കാലാവധി അവസാനിക്കാന് മണിക്കൂറുകള് മാത്രം ബാക്കി നില്ക്കെ സമരം ചെയ്യുന്ന മൂന്നു വനിത ഉദ്യോഗാര്ത്ഥികള് ഉള്പ്പെടെ 45 പേര്ക്ക് നിയമന ശുപാര്ശ ലഭിച്ചിരുന്നു.
സെക്രട്ടറിയേറ്റിനു മുന്നില് സമരം ചെയ്യുന്ന വനിത സിവില് പൊലീസ് ഉദ്യോഗാര്ത്ഥികളുടെ റാങ്ക് ലിസ്റ്റിന്റെ കാലാവധി ഇന്ന് അവസാനിക്കും. നിലവില് 964 പേര് ഉള്പ്പെട്ട റാങ്ക് ലിസ്റ്റില് 30% പേര്ക്ക് മാത്രമാണ് നിയമനം ലഭിച്ചിട്ടുള്ളത്.
കാലാവധി അവസാനിക്കാന് മണിക്കൂറുകള് മാത്രം ബാക്കി നില്ക്കെ സമരം ചെയ്യുന്ന മൂന്നു വനിത ഉദ്യോഗാര്ത്ഥികള് ഉള്പ്പെടെ 45 പേര്ക്ക് നിയമന ശുപാര്ശ ലഭിച്ചിരുന്നു. എന്നാല് പരമാവധി നിയമനം നടത്തണമെന്നാണ് സമരം തുടരുന്നവരുടെ ആവശ്യം.
കഴിഞ്ഞ ദിവസവും പ്രതീകാത്മക ബാലറ്റ് പെട്ടിയില് വോട്ട് ചെയ്തും, റീത്ത് വച്ചും സമരക്കാര് പ്രതിഷേധിച്ചിരുന്നു. എന്നാല് ഉദ്യോഗാര്ത്ഥിളോട് സര്ക്കാര് ഇതുവരെ അനുകൂല നിലപാട് സ്വീകരിച്ചിട്ടില്ല.
ഈ മാസം തുടക്കത്തിലാണ് വനിതാ സിവില് പൊലീസ് ഓഫീസര് റാങ്ക് ലിസ്റ്റിലെ ഉദ്യോഗാര്ത്ഥികള് സെക്രട്ടേറിയറ്റിന് മുന്നില് രാപ്പകല് സമരം ആരംഭിച്ചത്. കഴിഞ്ഞ വര്ഷം ഏപ്രില് 20 നാണ് 964 പേരുള്പ്പെട്ട വനിതാ സിവില് പോലീസ് ഓഫീസര് റാങ്ക് ലിസ്റ്റ് പ്രസിദ്ധീകരിക്കുന്നത്.
