പൊതു ഇടങ്ങളിലെ സ്ത്രീകൾ അനുഭവിക്കുന്ന പ്രശ്നങ്ങൾ പരിഹരിക്കുന്നതിന് പദ്ധതികൾ ആവിഷ്കരിക്കും; വനിതാ കമ്മീഷൻ

കാസർ​ഗോട് :  പൊതു ഇടങ്ങളിലെ‌ സ്ത്രീകളുടെ പ്രശ്നങ്ങൾ പരിഹരിക്കുന്നതിനായി വനിതാ കമ്മീഷൻ നേതൃത്വത്തിൽ പദ്ധതികൾ ആവിഷ്കരിക്കുമെന്ന് കേരള വനിതാ കമ്മീഷൻ അംഗം അഡ്വ.പി.കുഞ്ഞായിഷ പറഞ്ഞു. കാസർകോട് ജില്ലാപഞ്ചായത്ത് ഹാളിൽ നടന്ന ജില്ലാ തല അദാലത്തിൽ പരാതി കേട്ടശേഷം മാധ്യമങ്ങളോട് സംസാരിക്കുകയായിരുന്നു അവർ. ഇതിനു മുന്നോടിയായി പ്രശ്നങ്ങൾ പഠിച്ച് നിർദേശങ്ങൾ സമർപ്പിക്കുന്നതിനായി ജനുവരി മുതൽ സെമിനാറുകൾ സംഘടിപ്പിക്കുമെന്നും അഡ്വ. പി കുഞ്ഞായിഷ പറഞ്ഞു.
 
 സ്ത്രീകൾക്ക് നേരെയുള്ള കടന്നുകയറ്റവും അതിക്രമവും തടയുന്നതിന് യാത്ര വേളകളിലും തൊഴിലിടങ്ങളിലും സ്ത്രീ സുരക്ഷ ഉറപ്പുവരുത്തണമെന്നും പി കുഞ്ഞായിഷ പറഞ്ഞു. പൊതു ഇടങ്ങളിൽ സ്ത്രീകൾ ധൈര്യപൂർവ്വം ഇടപെടുന്നത് തടയുക, തുല്യത നടത്തിവരുന്നത് തടയുക, ജനാധിപത്യ പ്രക്രിയയിൽ പങ്കാളികളാവുന്നത് തടയുക എന്നീ ലക്ഷ്യങ്ങൾ മുൻനിർത്തി അരാജകത്വ ശക്തികൾ സോഷ്യൽ മീഡിയ പ്ലാറ്റ്ഫോമിൽ അടക്കം സ്ത്രീകളെ കുറ്റക്കാരായി ചിത്രീകരിക്കുന്നു. നിയമപരമായ ഇത്തരം കുറ്റകൃത്യങ്ങൾ നടത്തുന്നവർ സാങ്കേതിക കാര്യങ്ങളിൽ പഴുതുകൾ കാരണം രക്ഷപ്പെടുന്നു. ഇത്തരം പ്രവണതകളെ പ്രതിരോധിക്കണമെന്നും അവർ പറഞ്ഞു.