.jpg)
ആര്ത്തവ അവധിയില് സ്ത്രീ സമൂഹത്തിന് പരാതിയുണ്ടെങ്കില് പുനഃപരിശോധിക്കും: വിദ്യാഭ്യാസ മന്ത്രി എന് ഷംസുദ്ദീന്
ആര്ത്തവ സമയത്ത് കഠിനമായ ബുദ്ധിമുട്ടുകള് അനുഭവിക്കുന്ന വിദ്യാര്ത്ഥിനികളും സ്ത്രീകളുമുണ്ടെന്നും അവരെ ക്ലാസുകളില് പങ്കെടുപ്പിക്കാന് നിര്ബന്ധിക്കരുതെന്നും മന്ത്രി പറഞ്ഞു
വിദ്യാര്ത്ഥികള്ക്ക് എല്ലാ മാസവും മൂന്ന് ദിവസം ആര്ത്തവ അവധി നല്കുന്നതില് സ്ത്രീ സമൂഹത്തില് നിന്ന് പരാതിയുണ്ടെങ്കില് പുനഃപരിശോധിക്കുമെന്ന് വിദ്യാഭ്യാസ വകുപ്പ് മന്ത്രി എന് ഷംസുദ്ദീന്. പൊതു നിര്ദേശമായി ഉയര്ന്നുവന്ന വിഷയം സര്ക്കാര് പരിഗണിച്ചു എന്ന് മാത്രമേയുളളുവെന്ന് ഷംസുദ്ദീന് പറഞ്ഞു. ആര്ത്തവ സമയത്ത് കഠിനമായ ബുദ്ധിമുട്ടുകള് അനുഭവിക്കുന്ന വിദ്യാര്ത്ഥിനികളും സ്ത്രീകളുമുണ്ടെന്നും അവരെ ക്ലാസുകളില് പങ്കെടുപ്പിക്കാന് നിര്ബന്ധിക്കരുതെന്നും മന്ത്രി പറഞ്ഞു. അവരെ പരിഗണിച്ചാണ് സര്ക്കാര് ഇത്തരമൊരു തീരുമാനമെടുത്തതെന്നും ആര്ത്തവ അവധി സംബന്ധിച്ച് യുഡിഎഫിനകത്ത് അഭിപ്രായ വ്യത്യാസമില്ലെന്നും മന്ത്രി വ്യക്തമാക്കി.
സംസ്ഥാനത്ത് നൂറുശതമാനം സ്കൂളുകലിലും പാഠപുസ്തകങ്ങള് എത്തിച്ചെന്നും വര്ക്ക് നോട്ടുകള് ജൂണ് പത്തോടെ വിതരണം ചെയ്യുമെന്നും മന്ത്രി അറിയിച്ചു. സംസ്ഥാനത്ത് എല്ലാ സ്കൂളുകളിലും പ്രവേശനോത്സവത്തിനുളള ഒരുക്കങ്ങള് പൂര്ത്തിയായെന്നും അദ്ദേഹം പറഞ്ഞു. ചില സ്കൂളുകള്ക്ക് ഫിറ്റ്നസ് നല്കുന്നില്ല എന്ന പരാതിയിലും അദ്ദേഹം പ്രതികരിച്ചു. സ്കൂളുകള്ക്ക് ഫിറ്റ്നസ് അനുവദിക്കുന്നതില് ചില ആശയക്കുഴപ്പങ്ങള് ഉണ്ടായിരുന്നു. തദ്ദേശ സ്ഥാപനങ്ങളിലെ ഉദ്യോഗസ്ഥര്ക്ക് ഇലക്ട്രിക്കല് പോലുളള സാങ്കേതികമായ വിഷയത്തില് ഇടപെടാന് കഴിയാത്തതായിരുന്നു പ്രശ്നം. അത് പരിഹരിച്ചുവരികയാണെന്നും മന്ത്രി കൂട്ടിച്ചേര്ത്തു.
