.jpg)
ആയിരവല്ലി ക്ഷേത്രക്കടവില്‍ കാണാതായ വൃദ്ധദമ്പതികളില്‍ ഭാര്യയുടെ മൃതദേഹം കണ്ടെത്തി
കാണാതായ ഭര്‍ത്താവ് നടേശനായി (83) അഗ്‌നിശമനസേന തെരച്ചില്‍ നടത്തിയെങ്കിലും രാത്രിയോടെ തെരച്ചില്‍ അവസാനിപ്പിച്ചു.
ആയിരവല്ലി ക്ഷേത്രക്കടവില്‍ കാണാതായ വൃദ്ധദമ്പതികളില്‍ ഭാര്യയുടെ മൃതദേഹം കണ്ടെത്തി. ഭര്‍ത്താവിനായി തെരച്ചില്‍ തുടരുന്നു. വട്ടിയൂര്‍ക്കാവ് നേതാജിറോഡ് ബോസ് ലെയിന്‍ താമസക്കാരായിരുന്ന വസന്തയുടെ(75) മൃതദേഹമാണ് ഫയര്‍ഫോഴ്‌സ് കണ്ടെത്തിയത്. ഇവരോടൊപ്പം കാണാതായ ഭര്‍ത്താവ് നടേശനായി (83) അഗ്‌നിശമനസേന തെരച്ചില്‍ നടത്തിയെങ്കിലും രാത്രിയോടെ തെരച്ചില്‍ അവസാനിപ്പിച്ചു.
ഇളയ മകന്‍ സജീവിനൊപ്പം താമസിച്ചിരുന്ന ഇരുവരും വ്യാഴാഴ്ച്ച ഉച്ചക്ക്ക് 11 മണിയോടെ വീട്ടില്‍ നിന്നും ഇറങ്ങിയതായി പറയുന്നു. ഉച്ചയോടെ മുന്നാംമൂട് ആയിരവല്ലി ക്ഷേത്രക്കടവില്‍ കരമനയാറ്റിലാണ് ഇവരെ കാണാതായത്. തുടര്‍ന്ന് ഫയര്‍ഫോഴ്‌സ് തിരുവനന്തപുരം യൂണിറ്റ് എത്തി നടത്തിയ തെരച്ചിലിലാണ് പുളിയറക്കോണം എലക്കോട് പള്ളിക്ക് സമീപത്തുന്നിന്ന് വൈകുന്നേരം നാല് മണിയോടെ വസന്തകുമാരിയുടെ മൃതദേഹം കണ്ടെടുത്തത്.
വസന്തകുമാരി നടക്കാനായി സഹായത്തിനുപയോഗിച്ചിരുന്ന വാക്കറും നടേശന്റെ ഷര്‍ട്ടും കടവില്‍ നിന്ന് കണ്ടെടുത്തു. ആത്മഹത്യയാകാമെന്നാണ് പ്രാഥമിക നിഗമനം. വസന്തകുമാരിയുടെ മൃതദേഹം ആശുപത്രി മോര്‍ച്ചറിയിലേയ്ക്ക് മാറ്റി. നടേശനായി രാവിലെ തിരച്ചില്‍ തുടരും.
