.jpg)
മഴ എവിടെ ? സംസ്ഥാനത്ത് ഇന്നും നാളെയും അഞ്ചു ഡിഗ്രി വരെ ചൂട് കൂടാന് സാധ്യത
തിരുവനന്തപുരം: സംസ്ഥാനത്ത് മഴ കുറഞ്ഞതോടെ ചൂട് കൂടാൻ സാധ്യതയുണ്ടെന്ന് മുന്നറിയിപ്പ് നൽകി കാലാവസ്ഥാ വകുപ്പ്.ഇന്നും നാളെയും (ജൂലൈ 15, 16 തീയതികളില്) കേരളത്തിലെ ഒറ്റപ്പെട്ട സ്ഥലങ്ങളില് ഉയര്ന്ന താപനില സാധാരണയേക്കാള് നാലു മുതല് അഞ്ചു ഡിഗ്രി സെല്ഷ്യസ് വരെ കൂടാന് സാധ്യതയുണ്ടെന്നും മുന്നറിയിപ്പിൽ പറയുന്നു.
അതിനിടെ വടക്കന് ബംഗാള് ഉള്ക്കടലിനും അതിനോട് ചേര്ന്നുള്ള തെക്കന് ബംഗ്ലാദേശിനും മുകളിലായി ഇന്നലെ നിലനിന്നിരുന്ന ചക്രവാതച്ചുഴി ഇന്ന് രാവിലെയോടെ വടക്ക്-പടിഞ്ഞാറന് ബംഗാള് ഉള്ക്കടലില് വടക്കന് ഒഡീഷ - പശ്ചിമ ബംഗാള് തീരങ്ങള്ക്ക് മുകളിലായി ന്യൂനമര്ദ്ദമായി ശക്തിപ്രാപിച്ചു. അടുത്ത രണ്ടു ദിവസത്തിനുള്ളില് ശക്തി കൂടിയ ന്യൂനമര്ദ്ദമായി മാറാനും വടക്കന് ഒഡിഷയ്ക്കും പശ്ചിമ ബംഗാളിലെ ഗംഗാ സമതലങ്ങള്ക്കും കുറുകെ വടക്ക്-പടിഞ്ഞാറ് ദിശയിലേക്ക് നീങ്ങാനും സാധ്യതയുണ്ട്. കേരളത്തില് ഇന്നുമുതല് മുതല് ഞായറാഴ്ച വരെയുള്ള ദിവസങ്ങളില് നേരിയതോ മിതമായതോ ആയ മഴയ്ക്ക് സാധ്യതയെന്നും കാലാവസ്ഥ വകുപ്പിന്റെ മുന്നറിയിപ്പില് പറയുന്നു.
