'മുന്നില്‍ വരുന്ന ടിഷ്യു പേപ്പറുകളില്‍ ഒപ്പിടാറില്ല, ഫയല്‍ പരിശോധിച്ച് വിശദാംശങ്ങള്‍ പഠിച്ചാണ് തീരുമാനം എടുത്തത്'; മറുപടിയുമായി മുഖ്യമന്ത്രി

വൈദ്യുതി വാങ്ങല്‍ കരാറുമായി ബന്ധപ്പെട്ട പ്രതിപക്ഷ നേതാവ് പിണറായി വിജയന്റെ പ്രതികരണത്തിന് മറുപടിയുമായി മുഖ്യമന്ത്രി വി ഡി സതീശന്‍. വൈദ്യുതി കരാര്‍ സംബന്ധിച്ച് വിശദമായ മറുപടി നല്‍കിയിട്ടും ഉന്നയിച്ച അതേ 'ദുരൂഹ' ആരോപണം പ്രതിപക്ഷ നേതാവ് ഇന്നും ആവര്‍ത്തിക്കുകയാണെന്ന് മുഖ്യമന്ത്രി പറഞ്ഞു. 12.50 രൂപയ്ക്ക് ഹിമാചല്‍ പ്രദേശ് വൈദ്യുതി നല്‍കാമെന്ന് പറഞ്ഞതിന്റെ രേഖകള്‍ എവിടെയെന്ന് ചോദിച്ചതിന് പ്രതിപക്ഷ നേതാവ് മറുപടി പറഞ്ഞിട്ടുമില്ല. അതിനാല്‍ അത്തരമൊരു ഓഫര്‍ ഹിമാചല്‍ പ്രദേശ് നല്‍കിയിട്ടില്ലെന്ന് പ്രതിപക്ഷ നേതാവിന് ബോധ്യപ്പെട്ടെന്ന് കരുതട്ടെയെന്നും മുഖ്യമന്ത്രി പറഞ്ഞു.

ഹിമാചലില്‍ നിന്ന് വൈദ്യുതി വാങ്ങുന്നതിന് രാജസ്ഥാന്‍ ഒക്ടോബര്‍ 18ന് തീരുമാനിച്ചിരുന്നു. ഒക്ടോബര്‍ 28ന് രാജസ്ഥാന്‍ റെഗുലേറ്ററി കമ്മീഷന് മുന്നില്‍ കരാര്‍ നിര്‍ദേശങ്ങള്‍ എത്തുകയും ചെയ്തു. കെഎസ്ഇബി ശുപാര്‍ശയില്‍ അന്തിമ തീരുമാനം എടുക്കാന്‍ മുഖ്യമന്ത്രിയെന്ന നിലയില്‍ തന്റെ പക്കല്‍ ഫയല്‍ വരുന്നത് ഒക്ടോബര്‍ 30നാണെന്ന് മുഖ്യമന്ത്രി പറഞ്ഞു.

കെഎസ്ഇബി മികച്ചതാണെന്ന് കണ്ടെത്തിയ ഹിമാചല്‍ പ്രദേശ് വൈദ്യുതി വാങ്ങാത്തത് എന്തെന്ന ചേദ്യം ഇന്നും പ്രതിപക്ഷ നേതാവ് ആവര്‍ത്തിക്കുന്നു. അതേസമയം സംസ്ഥാനത്തെ വൈദ്യുതി പ്രതിസന്ധി കൃത്രിമമായി സൃഷ്ടിച്ചതാണെന്നും അങ്ങ് പറയുന്നു. എന്തൊരു വിരോധാഭാസമാണിത്. വൈദ്യുതി പ്രതിസന്ധിയെ കുറിച്ച് കെഎസ്ഇബി തന്നെയാണ് സര്‍ക്കാരിനെ അറിയിച്ചതെന്ന് രേഖകള്‍ ഉദ്ധരിച്ച് താന്‍ മറുപടി നല്‍കിയിട്ടും അതേ ആരോപണം പ്രതിപക്ഷ നേതാവ് വീണ്ടും ഉന്നയിക്കുന്നതിലാണ് ദുരൂഹതയെന്നും മുഖ്യമന്ത്രി പറഞ്ഞു.

ജിഎന്‍എ വൈദ്യുതി വാങ്ങുന്നതും പരിഗണിക്കാമെന്ന് മുന്‍ കെഎസ്ഇബി ചെയര്‍മാന്‍ സര്‍ക്കാരിന് നല്‍കിയ നോട്ടിലുണ്ട്. ജിഎന്‍എയില്‍ നിന്ന് വൈദ്യുതി വാങ്ങുന്നതിനെ ഇന്നും വിമര്‍ശിക്കുന്ന പ്രതിപക്ഷ നേതാവിന് ഈ നോട്ടിനെ കുറിച്ച് അറിയാത്തതാണോ? അതോ അറിഞ്ഞിട്ടും അറിയാത്ത ഭാവം നടിക്കുന്നതോ? കഴിഞ്ഞ സര്‍ക്കാരിന്റെ കാലത്തും ജിഎന്‍എ പ്ലാറ്റ്‌ഫോം ഉപയോഗിച്ചിട്ടുണ്ടെന്ന് പ്രതിപക്ഷ നേതാവ് ഇന്ന് സമ്മതിച്ചതില്‍ സന്തോഷമുണ്ടെന്നും വി ഡി സതീശന്‍ പറഞ്ഞു.

രേഖകള്‍ എവിടെ എന്നാണ് പ്രതിപക്ഷ നേതാവ് ആവര്‍ത്തിച്ച് ചോദിക്കുന്നത്. മുഖ്യമന്ത്രിയായിരുന്ന കാലത്ത് അങ്ങയോട്, അന്നത്തെ പ്രതിപക്ഷം ആവശ്യപ്പെട്ട ഏതെങ്കിലും ഒരു രേഖ നല്‍കിയിട്ടുണ്ടോ? ചോദ്യങ്ങള്‍ക്ക് മറുപടി പോലും നല്‍കിയിട്ടില്ല. പക്ഷേ ഇവിടെ കെഎസ്ഇബിയിലെ സിപിഎം സംഘടന ബന്ധപ്പെട്ട എല്ലാ രേഖകളും അങ്ങയുടെ കയ്യില്‍ എല്‍പ്പിച്ചിട്ടുണ്ടല്ലോ. ഇനിയും ആവശ്യമെങ്കില്‍ വ്യവസ്ഥാപിത മാര്‍ഗങ്ങളിലൂടെ അങ്ങേയ്ക്ക് അത് നേടിയെടുക്കാവുന്നതേയുള്ളൂ എന്നും മുഖ്യമന്ത്രി പറഞ്ഞു. ഫയല്‍ പരിശോധിച്ച് വിശദാംശങ്ങള്‍ പഠിച്ചാണ് തീരുമാനങ്ങള്‍ എടുത്തതെന്ന് പറഞ്ഞ മുഖ്യമന്ത്രി, മുന്നില്‍ വരുന്ന ടിഷ്യു പേപ്പറുകളിലൊന്നും തങ്ങള്‍ ഒപ്പിടാറില്ലെന്നും ചൂണ്ടിക്കാട്ടി.