കോഴിക്കോട് ബൈപ്പാസിലെ ടോൾപ്ലാസയുടെ 20 കിലോമീറ്റർ പരിധിയിൽ താമസിക്കുന്നവർക്ക് ടോളിൽ ഇളവ്, പ്രത്യേക പാസ് അനുവദിക്കും

കോഴിക്കോട്: കോഴിക്കോട് ബൈപ്പാസിലെ ടോൾപ്ലാസയുടെ 20 കിലോമീറ്റർ പരിധിയിൽ താമസിക്കുന്നവർക്ക് ടോളിൽ ഇളവ്. ഇവർക്കായി ദേശീയപാത അതോറിറ്റി പ്രതിമാസം 300 രൂപയുടെ പാസ് അനുവദിക്കും. ഇതുപയോഗിച്ച് ഒരുമാസം എത്രതവണയും യാത്രചെയ്യാം.

ഈ പാസുള്ളവർക്കും ഫാസ്ടാഗ് ഉപയോഗിക്കാമെങ്കിലും പാസിൽനിന്ന് മാത്രമേ തുക പിടിക്കൂ. ഇരുചക്ര- മുച്ചക്രവാഹനങ്ങൾക്ക് ടോളില്ലാതെ യാത്രചെയ്യാം. ഈ മാസം 30-ന് രാമനാട്ടുകരമുതൽ വെങ്ങളംവരെയുള്ള കോഴിക്കോട് ബൈപ്പാസിന്റെ പ്രവൃത്തി പൂർത്തിയാക്കി പൂർണമായി തുറന്നുകൊടുക്കും. സെപ്റ്റംബർ മുതലാണ് ടോൾപിരിവ് തുടങ്ങുക. പന്തീരാങ്കാവിൽ കൂടത്തുംപാറയിൽ രണ്ടുഭാഗത്തായാണ് ടോൾപ്ലാസ നിർമിച്ചത്. രണ്ടിടത്തുമായി അഞ്ചുവീതം ട്രാക്കുകളുണ്ട്. അതുകൊണ്ട് തിരക്ക് നിയന്ത്രിക്കാൻ കഴിയും.