.jpg)
ദീര്ഘകാല വൈദ്യുതി കരാര് റദ്ദാക്കിയതിനെതിരെ സര്ക്കാര് സമര്പ്പിച്ച ഹര്ജി തിങ്കളാഴ്ച സുപ്രീംകോടതി പരിഗണിക്കും
ഹര്ജി അടിയന്തരമായി പരിഗണിക്കണമെന്ന കേരളത്തിന്റെ ആവശ്യം കോടതി അംഗീകരിക്കുകയായിരുന്നു
ന്യൂഡല്ഹി: ദീര്ഘകാല വൈദ്യുതി കരാര് റദ്ദാക്കിയതിനെതിരെ കേരളസര്ക്കാര് സമര്പ്പിച്ച ഹര്ജി സുപ്രീംകോടതി തിങ്കളാഴ്ച പരിഗണിക്കും. ഹര്ജി അടിയന്തരമായി പരിഗണിക്കണമെന്ന കേരളത്തിന്റെ ആവശ്യം കോടതി അംഗീകരിക്കുകയായിരുന്നു. മുതിര്ന്ന അഭിഭാഷകര് കേരളത്തിന് വേണ്ടി സുപ്രീംകോടതിയില് ഹാജരാകും.
കേരളം അഭിമുഖീകരിക്കുന്ന വലിയ ഊര്ജ്ജ പ്രതിസന്ധി ചൂണ്ടിക്കാട്ടിയാണ്, ഹര്ജി അടിയന്തരമായി പരിഗണിക്കണമെന്ന് സംസ്ഥാന സര്ക്കാര് ആവശ്യപ്പെട്ടത്.ചീഫ് ജസ്റ്റിസ് സൂര്യകാന്ത് അധ്യക്ഷനായ മൂന്നംഗ ബെഞ്ചാണ് കേരള സര്ക്കാരിന്റെ ഹര്ജി പരിഗണിക്കുന്നത്.
ദീര്ഘകാല വൈദ്യുതി കരാര് റദ്ദാക്കിയതിലൂടെ സംസ്ഥാനം വലിയ സാമ്പത്തിക നഷ്ടം നേരിടുന്നു. ഇതുവരെ സംസ്ഥാനത്തിന് 12, 570 കോടി രൂപയുടെ നഷ്ടമുണ്ടായതായും സംസ്ഥാന സര്ക്കാര് ഹര്ജിയില് ചൂണ്ടിക്കാട്ടുന്നു. കേരളത്തിന് കുറഞ്ഞ വിലയ്ക്ക് വൈദ്യുതി ലഭിക്കുന്നില്ലെന്നും ഹര്ജിയില് പറയുന്നു.
വൈദ്യുതി റെഗുലേറ്ററി അപ്പലേറ്റ് ബോഡിയാണ് കരാര് റദ്ദാക്കിയത്. ഇതിനെതിരെ സര്ക്കാര് സുപ്രീംകോടതിയില് അപ്പീല് നല്കിയിരുന്നു. എന്നാല് അപ്പീലില് സുപ്രീംകോടതി വാദം കേട്ടിരുന്നില്ല. നിലവിലെ വൈദ്യുതി പ്രതിസന്ധിയുടെ പശ്ചാത്തലത്തിലാണ് ഹര്ജി അടിയന്തരമായി പരിഗണിക്കണമെന്ന് ആവശ്യപ്പെട്ടത്.