.jpg)
രാഹുല് മാങ്കൂട്ടത്തില് എംഎല്എയെ കസ്റ്റഡിയില് വാങ്ങാന് പൊലീസ് സംഘം ഇന്ന് അപേക്ഷ നല്കും
യുവതിയുടെ നഗ്ന ദൃശ്യങ്ങള് പകര്ത്തിയ മൊബൈല് ഫോണ് കണ്ടെത്തണം
ബലാത്സംഗ കേസില് അറസ്റ്റിലായ രാഹുല് മാങ്കൂട്ടത്തില് എംഎല്എയെ കസ്റ്റഡിയില് വാങ്ങാന് പൊലീസ് സംഘം ഇന്ന് അപേക്ഷ നല്കും. തിരുവല്ല ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയിലാണ് അപേക്ഷ നല്കുന്നത്. രാഹുലിനെ ഏഴു ദിവസത്തെ കസ്റ്റഡിയില് വേണമെന്നാണ് എസ്ഐടിയുടെ ആവശ്യം.
പരാതിക്കാരി ലൈംഗിക അതിക്രമം നേരിട്ട ഹോട്ടലില് പ്രതിയെ എത്തിച്ചു തെളിവെടുപ്പ് നടത്തണം, യുവതിയുടെ നഗ്ന ദൃശ്യങ്ങള് പകര്ത്തിയ മൊബൈല് ഫോണ് കണ്ടെത്തണം തുടങ്ങിയ ആവശ്യങ്ങള് ഉന്നയിച്ചാണ് അന്വേഷണസംഘം കസ്റ്റഡി അപേക്ഷ നല്കിയിരിക്കുന്നത്. ഇന്നലെ മജിസ്ട്രേറ്റിനു മുന്നില് ഹാജരാക്കിയപ്പോള് തന്നെ രാഹുല് ജാമ്യ അപേക്ഷ നല്കിയിരുന്നു. എന്നാല് ഇന്ന് ജാമ്യാപേക്ഷയില് വാദം നടത്തേണ്ടെന്നാണ് പ്രതിഭാഗത്തിന്റെ തീരുമാനം. കസ്റ്റഡി അപേക്ഷയില് അന്തിമ ഉത്തരവ് അറിഞ്ഞതിനുശേഷം മാത്രം ജാമ്യാപേക്ഷയില് വാദം നടത്താനാണ് രാഹുലിന്റെ അഭിഭാഷകര് തീരുമാനിച്ചിരിക്കുന്നത്. ഇന്നലെ റിമാന്ഡിലായ രാഹുല് നിലവില് മാവേലിക്കര സ്പെഷ്യല് സബ് ജയിലില് ആണുള്ളത്.
