.jpg)
വീടുകളില് വെള്ളം കയറിയ എല്ലാ കുടുംബങ്ങള്ക്കും സര്ക്കാര് പ്രഖ്യാപിച്ച 10,000 രൂപ ധനസഹായം ലഭ്യമാക്കും ; എ.പി. അനില്കുമാര്
സഹായം ലഭിക്കാന് ദുരിതാശ്വാസ ക്യാമ്പില് താമസിക്കണമെന്ന നിബന്ധനയില്ലെന്ന് അദ്ദേഹം വ്യക്തമാക്കി.
പ്രകൃതിക്ഷോഭത്തെത്തുടര്ന്ന് വീടുകളില് വെള്ളം കയറിയ എല്ലാ കുടുംബങ്ങള്ക്കും സര്ക്കാര് പ്രഖ്യാപിച്ച 10,000 രൂപ ധനസഹായം ലഭ്യമാക്കുമെന്ന് റവന്യൂമന്ത്രി എ.പി. അനില്കുമാര്. ചങ്ങനാശേരി താലൂക്കിലെ ദുരിതാശ്വാസ ക്യാമ്പുകള് സന്ദര്ശിച്ചശേഷം സംസാരിക്കുകയായിരുന്നു അദ്ദേഹം. സഹായം ലഭിക്കാന് ദുരിതാശ്വാസ ക്യാമ്പില് താമസിക്കണമെന്ന നിബന്ധനയില്ലെന്ന് അദ്ദേഹം വ്യക്തമാക്കി.
വെള്ളം കയറിയ വീടുകളിലെ താമസക്കാര് എവിടെയായിരുന്നാലും അര്ഹതയുണ്ടെങ്കില് സഹായം ലഭിക്കും. വ്യാപാരസ്ഥാപനങ്ങളില് വെള്ളം കയറിയവര്ക്കും 10,000 ധനസഹായം നല്കാന് സര്ക്കാര് തീരുമാനമുണ്ട്. അര്ഹരായ ഒരാള്ക്കും സര്ക്കാര് സഹായം ലഭിക്കാത്ത സാഹചര്യമുണ്ടാകില്ല. നാശനഷ്ടങ്ങളുടെ കണക്കെടുപ്പ് വേഗത്തില് പൂര്ത്തിയാക്കാന് നിര്ദേശം നല്കിയിട്ടുണ്ട്. പൂര്ണമായും തകര്ന്ന വീടുകളും ഭാഗികമായി തകര്ന്ന വീടുകളും ഉള്പ്പെടെ എല്ലാ നഷ്ടങ്ങളും കൃത്യമായി രേഖപ്പെടുത്തും.
നദികളില് അടിഞ്ഞുകൂടിയ മണ്ണും മണലും നീക്കം ചെയ്ത് ഒഴുക്കു വര്ധിപ്പിക്കുന്ന നടപടികള് മഴയ്ക്ക് ശേഷം ആരംഭിക്കും. 2018ലെ പ്രളയത്തിന് ശേഷം സ്വീകരിച്ച നടപടികളുടെ ഫലപ്രാപ്തി വിശദമായി വിലയിരുത്തുമെന്നും മന്ത്രി പറഞ്ഞു. ചെങ്ങന്നൂര്, തിരുവല്ല, ചങ്ങനാശേരി എന്നിവിടങ്ങളിലെ ദുരിതാശ്വാസ ക്യാമ്പുകള് സന്ദര്ശിച്ച മന്ത്രി ക്യാമ്പുകളുടെ പ്രവര്ത്തനം തൃപ്തികരമാണെന്ന് വിലയിരുത്തി. ആവശ്യമായ അടിസ്ഥാന സൗകര്യങ്ങള് ക്യാമ്പുകളില് ഒരുക്കിയിട്ടുണ്ട്. ജില്ലാ ഭരണകൂടം, ജനപ്രതിനിധികള്, സന്നദ്ധ സംഘടനകള്, ഉദ്യോഗസ്ഥര് എന്നിവര് ഏകോപനത്തോടെ പ്രവര്ത്തിക്കുന്നുണ്ട്. ക്യാമ്പുകളിലെ ഭക്ഷണം, കുടിവെള്ളം, ചികിത്സ, സുരക്ഷ തുടങ്ങിയ കാര്യങ്ങളില് പ്രത്യേക ശ്രദ്ധ നല്കാന് നിര്ദേശം നല്കിയിട്ടുണ്ട്.