.jpg)
കെഎസ്ആര്ടിസി ഓര്ഡിനറി ബസിലെ സൗജന്യ യാത്രയുടെ ഉദ്ഘാടന ചടങ്ങ് ബഹിഷ്കരിക്കുമെന്ന് സിപിഐഎം ; വിട്ടുനില്ക്കല് ചരിത്രപരമായ വിഡ്ഢിത്തരം ആവരുതെന്ന് മന്ത്രി സി പി ജോണ്
ഉദ്ഘാടനത്തില് പങ്കെടുക്കില്ലെന്ന് സിപിഐഎം സംസ്ഥാന സെക്രട്ടറി എം വി ഗോവിന്ദന് പറഞ്ഞു
കെഎസ്ആര്ടിസി ഓര്ഡിനറി ബസിലെ സൗജന്യ യാത്രയുടെ ഉദ്ഘാടന ചടങ്ങ് സിപിഐഎം എംഎല്എമാര് ബഹിഷ്കരിക്കും. ഉദ്ഘാടനത്തില് പങ്കെടുക്കില്ലെന്ന് സിപിഐഎം സംസ്ഥാന സെക്രട്ടറി എം വി ഗോവിന്ദന് പറഞ്ഞു. എല്ലാ സ്ത്രീകള്ക്കും സൗജന്യമായി ഏത് ഭാഗത്തും യാത്ര ചെയ്യാമെന്നായിരുന്നു യുഡിഎഫ് തെരഞ്ഞെടുപ്പ് വാഗ്ദാനമായി പറഞ്ഞതെന്ന് എം വി ഗോവിന്ദന് ചൂണ്ടിക്കാട്ടി.
'മലബാറില് അപൂര്വമായി മാത്രമേ ഓര്ഡിനറി ബസുള്ളു. ഉദ്ഘാടനത്തില് സഹകരിക്കില്ല, ആളെ പറ്റിക്കുന്ന സമീപനമാണ് സര്ക്കാര് സ്വീകരിച്ചത്. പദ്ധതിയോട് എതിര്പ്പില്ല. എന്നാല് പറയുന്നത് അല്ല സര്ക്കാര് നടപ്പാക്കുന്നത്', എം വി ഗോവിന്ദന് പറഞ്ഞു.
അതേസമയം എം വി ഗോവിന്ദന്റെ പ്രസ്താവനയില് പ്രതികരണവുമായി ഗതാഗതവകുപ്പ് മന്ത്രി സി പി ജോണ് രംഗത്തെത്തി. വിട്ടുനില്ക്കല് ചരിത്രപരമായ വിഡ്ഢിത്തരം ആവരുതെന്ന് സി പി ജോണ് പറഞ്ഞു. ബഹിഷ്കരിച്ചാല് തനിക്ക് എന്ത് ചെയ്യാന് കഴിയുമെന്നും സി പി ജോണ് ചോദിച്ചു. വിട്ടുനില്ക്കുകയാണെങ്കില് തനിക്ക് ഒന്നും പറയാനില്ലെന്നും സി പി ജോണ് കൂട്ടിച്ചേര്ത്തു.
