ഒരു രാജ്യത്തിൻ്റെ പരമോന്നത നേതാവിനെയും ഉന്നത ഉദ്യോഗസ്ഥരെയും വധിക്കുന്നത് ശക്തമായ ഭാഷയിൽ അപലപിക്കപ്പെടേണ്ടതാണ് ; എം.എ. ബേബി

 ഇറാൻ്റെ ദേശീയ പരമാധികാരത്തെയും അന്താരാഷ്ട്ര നിയമങ്ങളെയും വെല്ലുവിളിച്ചുകൊണ്ട് അമേരിക്കയും ഇസ്രയേലും നടത്തുന്ന ആക്രമണങ്ങൾക്കെതിരെ സിപിഐഎം ജനറൽ സെക്രട്ടറി എം.എ. ബേബി രം​ഗത്ത്. ഇറാൻ സർക്കാരിൻ്റെ ചില ജനാധിപത്യവിരുദ്ധ നടപടികളോട് വിയോജിപ്പുണ്ടെങ്കിലും, ഒരു രാജ്യത്തിൻ്റെ പരമോന്നത നേതാവിനെയും ഉന്നത ഉദ്യോഗസ്ഥരെയും വധിക്കുന്നത് ശക്തമായ ഭാഷയിൽ അപലപിക്കപ്പെടേണ്ടതാണെന്ന് അദ്ദേഹം പറഞ്ഞു. ലാറ്റിൻ അമേരിക്കയിലും അഫ്ഗാനിസ്ഥാൻ, ലിബിയ, സിറിയ തുടങ്ങിയ രാജ്യങ്ങളിലും അമേരിക്ക ആവർത്തിച്ച ക്രൂരമായ തന്ത്രമാണിതെന്നും, ലോകസമാധാനത്തിന് ഏറ്റവും വലിയ ഭീഷണി അമേരിക്കൻ മിലിട്ടറി-ഇൻഡസ്ട്രിയൽ കോംപ്ലക്സാണെന്ന് ഒരിക്കൽ കൂടി തെളിയിക്കപ്പെട്ടിരിക്കുകയാണെന്നും അദ്ദേഹം കൂട്ടിച്ചേർത്തു.