കെ.എസ്.ആർ.ടി.സി ബസിൽ യുവതിക്കുനേരെ യാത്രക്കാരൻ ലൈംഗികാതിക്രമവും നഗ്നത പ്രദർശനവും ; പ്രതിക്കായി ലൂക്കൗട്ട് നോട്ടീസ്

 കൊണ്ടോട്ടി : കെ.എസ്.ആർ.ടി.സി ബസിൽ യുവതിക്കുനേരെ യാത്രക്കാരൻ ലൈംഗികാതിക്രമവും നഗ്നത പ്രദർശനവും നടത്തിയതായി പരാതി. യുവതിയുടെ പരാതിയിൽ കൊണ്ടോട്ടി പൊലീസ് കേസെടുത്ത് അന്വേഷണം ആരംഭിച്ചു. പ്രതിയെ കണ്ടെത്താൻ സാധിക്കാത്ത പസാഹചര്യത്തിൽ ലുക്കൗട്ട് നോട്ടീസ് പുറത്തിറക്കി അന്വേഷണം ഊർജിതമാക്കിയതായി പൊലീസ് അറിയിച്ചു.

വെള്ളിയാഴ്ച വൈകീട്ട് 3.45ന് പുളിക്കലിനടുത്ത് വെച്ചാണ് കേസിനാസ്പദമായ സംഭവം. കോഴിക്കോട്ടുനിന്ന് പാലക്കാട് ഭാഗത്തേക്ക് പോവുകയായിരുന്ന ബസിലെ യാത്രക്കാരി മൊറയൂർ പഞ്ചായത്തിലെ മോങ്ങം ഒളമതിൽ സ്വദേശിയായ 27കാരിക്കാണ് ദുരനുഭവം.

ഇവർ ബസിലെ ജനറൽ സീറ്റിലിരുന്ന് യാത്ര ചെയ്യുന്നത് ചോദ്യം ചെയ്‌തെത്തിയ പ്രതി തന്റെ സ്വകാര്യ ഭാഗത്ത് കൈമുട്ടുകൊണ്ട് സ്പർശിക്കുകയും പിന്നീട് നഗ്നത പ്രദർശനം നടത്തി അപമാനിക്കുകയും ചെയ്തെന്നാണ് യുവതി പൊലീസിൽ നൽകിയ പരാതി.

സംഭവമുണ്ടായ ഉടൻ യുവതി പ്രതികരിച്ചെങ്കിലും ബസ് ജീവനക്കാരുടെ ഭാഗത്തുനിന്ന് പിന്തുണയുണ്ടായില്ലെന്ന് ആക്ഷേപമുണ്ട്. ബസ് പൊലീസ് സ്റ്റേഷനിലെത്തിക്കാത്തതിനാൽ പ്രതിക്ക് രക്ഷപ്പെടാൻ അവസരം ലഭിക്കുകയും ചെയ്തു. യുവതിക്കുനേരെ അപമര്യാദയായി പെരുമാറിയ യാത്രക്കാരനെ ഉടൻ കണ്ടെത്താനാകുമെന്ന പ്രതീക്ഷയിലാണ് പൊലീസ്.