ഒത്തുതീർപ്പ് ശ്രമങ്ങൾ പരാജയപ്പെട്ടു;ഭാരതപ്പുഴയുടെ തീരത്ത് ഇത്തവണ രണ്ട് മഹാമാഘ മഹോത്സവങ്ങൾ

മലപ്പുറം: റവന്യൂ വകുപ്പിന്റെയും നാവമുകുന്ദ ക്ഷേത്ര ട്രസ്റ്റിയായ സാമൂതിരിയുടെയും നേതൃത്വത്തിൽ നടത്തിയ അനുരഞ്ജന ശ്രമങ്ങൾ പരാജയപ്പെട്ടതോടെ, തിരുനാവായിൽ ഭാരതപ്പുഴയുടെ തീരത്ത് രണ്ട് വ്യത്യസ്ത മഹാമാഘ ഉത്സവങ്ങൾ നടക്കുമെന്ന് ഉറപ്പായി. 2027-ലെ മാഘ മഹോത്സവത്തിനായി മാർഗദർശക് മണ്ഡലത്തിന്റെ കീഴിൽ 1,001 അംഗ പുതിയ സംഘാടക സമിതി രൂപീകരിച്ചു.

തിരുനാവായിൽ കുംഭമേള മാതൃകയിൽ മഹാമാഘം സംഘടിപ്പിക്കുമെന്ന് ജുന അഖാഡ നേരത്തെ പ്രഖ്യാപിക്കുകയും ഇതിനായി പ്രത്യേക സമിതി രൂപീകരിക്കുകയും ചെയ്തിരുന്നു. ഇതിന് പിന്നാലെയാണ് മാർഗദർശക് മണ്ഡലത്തിന്റെ പിന്തുണയോടെ 2027 ജനുവരി 22 മുതൽ ഫെബ്രുവരി 21 വരെ നടത്തുന്ന മഹോത്സവത്തിനായി പുതിയ സമിതി നിലവിൽ വന്നത്. ഇരു വിഭാഗങ്ങളും ഭിന്നതകൾ മാറ്റിവെച്ച് സംയുക്തമായി ഉത്സവം നടത്തണമെന്ന് റവന്യൂ വകുപ്പും സാമൂതിരിയും ആവശ്യപ്പെട്ടിരുന്നെങ്കിലും സമവായമായില്ല. സംയുക്തമായി നടത്തിയാൽ മാത്രമേ ക്ഷേത്ര പരിസരത്തേക്ക് പ്രവേശനം അനുവദിക്കൂ എന്നും നദീതീരം വിട്ടുനൽകുകയുള്ളൂ എന്നും അധികൃതർ വ്യക്തമാക്കിയിരുന്നു. പരിപാടികൾ ഏഴു ദിവസമായി ചുരുക്കണമെന്നും നിർദേശമുണ്ടായിരുന്നു.

നാവമുകുന്ദ ക്ഷേത്രത്തിന് സമീപം നടന്ന ചടങ്ങിലാണ് 1,001 അംഗ സംഘാടക സമിതി പ്രഖ്യാപിച്ചത്. മാതാ അമൃതാനന്ദമയി ദേവി മുഖ്യ രക്ഷാധികാരിയായും, പത്മവിഭൂഷൻ ജേതാവ് ഇ. ശ്രീധരൻ ചെയർമാനായും പ്രവർത്തിക്കും. എസ്.എൻ.ഡി.പി. യോഗം ജനറൽ സെക്രട്ടറി വെള്ളാപ്പള്ളി നടേശൻ, മുൻ ഡി.ജി.പി. ടി.പി. സെൻകുമാർ, മുൻ ജഡ്ജിമാരായ കെ.ടി. ശങ്കരൻ, പി.എൻ. രവീന്ദ്രൻ, എം. രാമചന്ദ്രൻ, ഡോ. കെ.എസ്. രാധാകൃഷ്ണൻ, കെ.പി. ശശികല ടീച്ചർ, ഡോ. ലക്ഷ്മികുമാരി തുടങ്ങിയവരാണ് രക്ഷാധികാരികൾ. പത്മ പുരസ്കാര ജേതാക്കളായ കൈതപ്രം ദാമോദരൻ നമ്പൂതിരി, രാമചന്ദ്ര പുലവർ, കുഞ്ഞോൻ മാസ്റ്റർ, ബാലൻ പൂതേരി തുടങ്ങിയവരും സമിതിയിലുണ്ട്