.jpg)
മഴ ശക്തം ; ഇന്ന് എല്ലാ ജില്ലകളിലും യെല്ലോ അലര്ട്ട്
മഴ ശക്തമായി തുടരുന്നതിനാല് പമ്പയില് ജലനിരപ്പ് ഉയരുകയാണ്.
സംസ്ഥാനത്ത് ഇന്നും ശക്തമായ മഴയ്ക്ക് സാധ്യതയെന്ന് കേന്ദ്രകാലാവസ്ഥാ റിപ്പോര്ട്ട്. സംസ്ഥാനത്തെ എല്ലാ ജില്ലകളിലും ഇന്ന് യെല്ലോ അലര്ട്ട് ആണ്. മഴയോടൊപ്പം ശക്തമായ കാറ്റിനും ഇടിമിന്നലിനും സാധ്യതയുണ്ട്. തെക്കന് ഗുജറാത്ത് തീരം മുതല് വടക്കന് കേരള തീരം വരെ നീളുന്ന തീരദേശ ന്യൂനമര്ദ്ദ പാത്തിയുടെ സ്വാധീനത്തിലാണ് കേരളത്തില് മഴ ശക്തമായത്. കാലാവസ്ഥ മോശമായതിനാല് കേരളതീരത്തുനിന്ന് മത്സ്യത്തൊഴിലാളികള് കടലില് പോകരുതെന്നും നിര്ദേശം ഉണ്ട്.
മഴ ശക്തമായി തുടരുന്നതിനാല് പമ്പയില് ജലനിരപ്പ് ഉയരുകയാണ്. റാന്നി, കോഴഞ്ചേരി താലൂക്കുകളില് അതീവ ജാഗ്രത വേണമെന്നാണ് അധികൃതരുടെ നിര്ദേശം. കൂടുതല് സ്ഥലങ്ങളില് നിന്ന് ആളുകളെ സുരക്ഷിതമായ സ്ഥലങ്ങളിലേക്ക് മാറ്റുന്നുണ്ട്. മന്ത്രിയുടെ നേതൃത്വത്തില് യോഗം ചേരുകയാണ്. മൂഴിയാര് ഡാം ഉടന് തുറക്കുമെന്ന് പ്രദേശവാസികള്ക്ക് മുന്നറിയിപ്പ് നല്കി. മൂഴിയാര് ഡാമിന്റെ വൃഷ്ടി പ്രദേശത്ത് ശക്തമായ മഴയത്ത് തുടര്ന്ന് ഡാമിലെ ജലനിരപ്പ് റെഡ് അലര്ട്ട് ലെവലായ 190 മീറ്റര് എത്തിയിട്ടുണ്ട്. ജലനിരപ്പ് പരമാവധി നിലയായ 192.63 മീറ്റര് എത്തിയാല് ഡാമിന്റെ ഷട്ടറുകള് ഉയര്ത്തി ജലം കക്കാട്ടാറിലേക്ക് ഒഴുക്കി വിടും.
