പ്ലാന്റ് നവീകരണം പൂർത്തിയായി; ശബരിമലയിൽ അരവണ നിർമ്മാണം പുനരാരംഭിച്ചു

പത്തനംതിട്ട: നവീകരണ പ്രവർത്തനങ്ങൾക്കായി അടച്ചിട്ടിരുന്ന ശബരിമലയിലെ അരവണ പ്ലാന്റിൽ ഉൽപ്പാദനം പുനരാരംഭിച്ചു. പ്ലാന്റിലെ അറ്റകുറ്റപ്പണികളും നവീകരണവും പൂർത്തിയായതിനെ തുടർന്നാണ് നിർമ്മാണം വീണ്ടും തുടങ്ങിയത്.

കഴിഞ്ഞ ഒരു മാസത്തോളമായി പ്ലാന്റിന്റെ പ്രവർത്തനം നിർത്തിവെച്ചിരിക്കുകയായിരുന്നു. നിലവിൽ പ്രതിദിനം ഒന്നരലക്ഷത്തോളം ടിൻ അരവണ നിർമ്മിക്കാനാണ് ലക്ഷ്യമിടുന്നത്. ഒക്ടോബർ 20-ന് ശേഷം ഉൽപ്പാദന ശേഷി വർദ്ധിപ്പിച്ച് പ്രതിദിനം മൂന്നര ലക്ഷത്തോളം ടിൻ അരവണ ഉൽപ്പാദിപ്പിക്കാൻ സാധിക്കുമെന്നാണ് വിലയിരുത്തൽ.