ഓൺലൈൻ സാമ്പത്തിക തട്ടിപ്പ്; പണം നഷ്ടപ്പെട്ട് 24 മണിക്കൂറിനകം ബാങ്കിലും പൊലീസിലും വിവരമറിയിച്ച ഇടപാടുകാരിക്ക് നഷ്ടപ്പെട്ട തുക നൽകാൻ എസ്ബിഐക്ക് നിർദ്ദേശം നൽകി ഹൈക്കോടതി

കൊച്ചി: ഓൺലൈൻ സാമ്പത്തിക തട്ടിപ്പിൽ പണം നഷ്ടപ്പെട്ട് 24 മണിക്കൂറിനകം ബാങ്കിലും പൊലീസിലും വിവരമറിയിച്ച ഇടപാടുകാരിക്ക് നഷ്ടപ്പെട്ട തുകയായ 3.73 ലക്ഷം രൂപ തിരികെ നൽകാൻ സ്റ്റേറ്റ് ബാങ്ക് ഓഫ് ഇന്ത്യയോട് കേരള ഹൈക്കോടതി ഉത്തരവിട്ടു. തട്ടിപ്പിൽ ഇടപാടുകാരിക്ക് യാതൊരുവിധ പങ്കുമില്ലെന്ന് വ്യക്തമാകുമ്പോഴും, കൃത്യസമയത്ത് വിവരം അറിയിച്ച സാഹചര്യത്തിലും അവർക്ക് റിസർവ് ബാങ്ക് ഓഫ് ഇന്ത്യയുടെ 'സീറോ ലയബിലിറ്റി' വ്യവസ്ഥയ്ക്ക് അർഹതയുണ്ടെന്ന് ജസ്റ്റിസ് ഹരിശങ്കർ വി മേനോൻ വ്യക്തമാക്കി. ഇടപാടുകാരിയുടെ പരാതി തള്ളിയ ബാങ്കിങ് ഓംബുഡ്സ്മാന്റെ ഉത്തരവ് റദ്ദാക്കിക്കൊണ്ടാണ് ഹൈക്കോടതിയുടെ സുപ്രധാന വിധി.

ചിപ്പില്ലാത്ത പഴയ ഡെബിറ്റ് കാർഡുകൾ എസ്ബിഐ ബ്ലോക്ക് ചെയ്യുമെന്ന വിവരത്തിന് പിന്നാലെയാണ് പരാതിക്കാരിക്ക് തട്ടിപ്പ് സന്ദേശം ലഭിച്ചത്. കാർഡ് ബ്ലോക്ക് ആകാതിരിക്കാൻ ഓൺലൈനായി വിവരങ്ങൾ പുതുക്കണമെന്ന് ആവശ്യപ്പെട്ട് വന്ന എസ്എംഎസിന് പിന്നാലെ അതേ നമ്പറിൽ നിന്ന് ഫോൺ കോളുമെത്തി. 'സ്റ്റേറ്റ് ബാങ്ക് സെക്യൂർ ആപ്പ്' ഇൻസ്റ്റാൾ ചെയ്യാനെന്ന വ്യാജേന വിളിച്ചയാൾ ആവശ്യപ്പെട്ട ഒടിപി പരാതിക്കാരി കൈമാറിയ ഉടൻ തന്നെ അക്കൗണ്ടിൽ നിന്ന് 3.75 ലക്ഷം രൂപ നഷ്ടപ്പെടുകയായിരുന്നു. തട്ടിപ്പ് മനസ്സിലായ ഉടൻ തന്നെ കസ്റ്റമർ കെയർ വഴിയും ബാങ്ക് ബ്രാഞ്ചിലും പരാതിപ്പെടുകയും നെറ്റ് ബാങ്കിങ് അക്കൗണ്ട് മരവിപ്പിക്കുകയും ചെയ്തു.

പരാതിക്കാരി അന്നുതന്നെ പൊലീസിലും പരാതി നൽകി. തുടർന്ന് നടത്തിയ പൊലീസ് അന്വേഷണത്തിൽ പശ്ചിമ ബംഗാൾ സ്വദേശിയായ സന്ദീപ് ബൗരിയാണ് തട്ടിപ്പ് നടത്തിയതെന്ന് കണ്ടെത്തി. എന്നാൽ നഷ്ടപ്പെട്ട പണം തിരികെ നൽകാൻ ബാങ്ക് തയ്യാറാവാതിരുന്നതിനെ തുടർന്ന് ഇവർ ബാങ്കിങ് ഓംബുഡ്സ്മാനെ സമീപിച്ചു. ഒടിപി പങ്കുവെച്ചതിനാൽ ഇടപാടുകാരിയുടെ അശ്രദ്ധയാണെന്നും അവർക്കും തട്ടിപ്പിൽ അറിവുണ്ടായിരുന്നുവെന്നും വിലയിരുത്തി ഓംബുഡ്സ്മാൻ പരാതി തള്ളുകയായിരുന്നു. തുടർന്നാണ് പരാതിക്കാരി ഹൈക്കോടതിയെ സമീപിച്ചത്.