ജർമ്മനിയിലേയ്ക്കുളള നഴ്സിങ് റിക്രൂട്ട്മെന്റ്: നോർക്ക ട്രിപ്പിൾ വിൻ കേരള ആറു പേർക്കു കൂടി എംപ്ലോയ്മെന്റ് കോൺട്രാക്ട് കൈമാറി

കേരളത്തിൽ നിന്നും ജർമ്മനിയിലേയ്ക്കുളള നഴ്സിങ് റിക്രൂട്ട്മെന്റ് പദ്ധതിയായ നോർക്ക ട്രിപ്പിൾ വിൻ കേരള യുടെ ഭാഗമായി തിരഞ്ഞെടുത്ത് ആറു പേർക്കു കൂടി എംപ്ലോയ്മെന്റ് കോൺട്രാക്ട് കൈമാറി. നോർക്ക ട്രിപ്പിൾ വിൻ കേരളയുടെ ഏഴാം ബാച്ചിലെ ശിൽപ വൈലോങ്കര, ഏഞ്ചൽ റോസ്, ജ്യോത്സ്ന ബിനു, അനിറ്റ് ജിജി, ഐശ്വര്യ മുരളീധരൻ, റെക്സി വർഗീസ് എന്നിവർക്കാണ്  കോൺട്രാക്ട് കൈമാറിയത്. രണ്ടു പേർക്ക് ഷാരിറ്റെ യൂണിവേഴ്സിറ്റി ഹോസ്പിറ്റലിലും, മറ്റുളളവർക്ക്  ലാൻഡ്‌ഷൂട്ടിലെ എൽ.എ. റീജിയോ ക്ലിനിക്കിലുമാണ് നിയമനം ലഭിക്കുക. നടപടിക്രമങ്ങൾ പൂർത്തിയാക്കി ഇവർക്ക് ഒക്ടോബർ-നവംബർ മാസങ്ങളിൽ ജർമ്മനിയിലെത്താനാകും. തിരുവനന്തപുരം തൈക്കാട് നോർക്ക സെന്ററിൽ നടന്ന ചടങ്ങിൽ ജനറൽ മാനേജർ പ്രകാശ് പി ജോസഫ്, റിക്രൂട്ട്മെന്റ് വിഭാഗം ജീവനക്കാർ, ഉദ്യോഗാർത്ഥികളുടെ രക്ഷിതാക്കൾ എന്നിവരും സംബന്ധിച്ചു.   

നോർക്ക റൂട്ട്‌സും ജർമ്മൻ ഫെഡറൽ എംപ്ലോയ്‌മെന്റ് ഏജൻസിയും ജർമ്മൻ ഏജൻസി ഫോർ ഇന്റർനാഷണൽ കോ-ഓപ്പറേഷനും സംയുക്തമായി നടപ്പാക്കുന്ന  പദ്ധതിയാണ് നോർക്ക ട്രിപ്പിൾ വിൻ കേരള. ഇതിനായുളള കരാർ 2021 ഡിസംബർ 22 നാണ് ഒപ്പുവച്ചത്. ഇതുവരെ ഏട്ടു ബാച്ചുകളിലായി (ഫാസ്റ്റ് ട്രാക്ക് ഉൾപ്പെടെ) നടത്തിയ റിക്രൂട്ട്മെന്റ് ഡ്രൈവുകളിൽ നിന്നും 1700 ഓളം ഉദ്യോഗാർത്ഥികളെ തിരഞ്ഞെടുക്കുകയും, 1100-ൽ അധികം നഴ്സുമാർ ജർമ്മനിയിലെത്തി ജോലിയിൽ പ്രവേശിച്ചിട്ടുണ്ട്. ജർമ്മനിയിലെ 13 സ്റ്റേറ്റുകളിലെ വിവിധ ആരോഗ്യപരിപാലന സ്ഥാപനങ്ങളിൽ  രജിസ്ട്രേഡ് നഴ്സ് തസ്തികയിലാണ് ഇവരുടെ നിയമനം.