.jpg)
നിതിന് രാജിന്റെ മരണം ; ദളിത് സംഘടനകള് നടത്തുന്ന ഹര്ത്താല്; പരീക്ഷകള് മാറ്റി കേരള ടെക്നിക്കല് യൂണിവേഴ്സിറ്റി
തിരുവനന്തപുരം: കേരള ടെക്നിക്കല് യൂണിവേഴ്സിറ്റി ഇന്ന് നടത്താനിരുന്ന പരീക്ഷകള് മാറ്റി.
ദളിത് സംഘടനകള് നടത്തുന്ന ഹര്ത്താലിനെ തുടര്ന്നാണ് പരീക്ഷകള് മാറ്റിയത്. പുതുക്കിയ തീയതി സര്വകലാശാല വെബ്സൈറ്റില് ലഭ്യമാണ്.
നിതിന് രാജിന്റെ മരണത്തിന്റെ ഉത്തരവാദികളായവരെ അറസ്റ്റ് ചെയ്യണമെന്ന് ആവശ്യപ്പെട്ട് നിതിന് രാജ് ആക്ഷന് കൗണ്സിലും വിവിധ ദളിത്-ആദിവാസി സംഘടനകളും ആഹ്വാനം ചെയ്ത ഹര്ത്താല് രാവിലെ 6 മണി മുതല് വൈകിട്ട് 6 മണി വരെയാണ്.
ഹര്ത്താലില് നിര്ബന്ധിതമായി വാഹനങ്ങള് തടയില്ലെന്നും ഹര്ത്താലുമായി പൊതുജനങ്ങള് സഹകരിക്കണമെന്നും നിതിന് രാജ് ആക്ഷന് കൗണ്സില് ആവശ്യപ്പെട്ടു. അവശ്യസര്വീസുകളെ ഹര്ത്താലില് നിന്ന് ഒഴിവാക്കും.
നിരവധി ജാതി അധിക്ഷേപ പരാതികള് വിദ്യാര്ത്ഥികളുടെ ഭാഗത്ത് നിന്ന് വന്നിട്ടും കോളേജില് അത്തരം വിവേചന സമീപനങ്ങള് ഉണ്ടാകുന്നില്ലെന്നും പ്രതികള് കുറ്റക്കാരല്ലെന്നുമുള്ള കണ്ണൂര് ഡെന്റല് കോളേജ് മാനേജ്മെന്റിന്റെ നിരുത്തരവാദപരമായ നിലപാടിനെതിരെ കൂടിയാണ് ഹര്ത്താല് നടത്തുന്നതെന്നും ആക്ഷന് കൗണ്സില് പറഞ്ഞിരുന്നു.
ജസ്റ്റിസ് ഫോര് നിതിന് രാജ് ആക്ഷന് കൗണ്സിലിന്റെ നേതൃത്വത്തില് നടക്കുന്ന ഹര്ത്താലിന് പൗരസമൂഹം ഉള്പ്പെടെ അറുപതോളം സംഘടനകള് പിന്തുണ പ്രഖ്യാപിച്ചിട്ടുണ്ട്.