നീറ്റ് യു.ജി. പരീക്ഷയിൽ അടുത്ത വർഷംമുതൽ പരിഷ്കാരം ; ധർമ്മേന്ദ്ര പ്രധാൻ

ന്യൂഡൽഹി: നീറ്റ് പുനഃപരീക്ഷാ തീയതി പുറത്തുവിട്ടതിന് പിന്നാലെ ദേശീയ മെഡിക്കൽ പ്രവേശന പരീക്ഷാ സമ്പ്രദായത്തിൽ സുപ്രധാനമായ പരിഷ്‌കരണമെന്ന് കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ. അടുത്ത വർഷം മുതൽ നീറ്റ് യുജി പരീക്ഷ പൂർണമായും കമ്പ്യൂട്ടർ അധിഷ്ഠിത പരീക്ഷ(CBT) ആയി നടത്തുമെന്നാണ് പത്രസമ്മേളനത്തിൽ മന്ത്രി അറിയിച്ചത്.

2026 ലെ നീറ്റ് യുജി പരീക്ഷയുടെ അഡ്മിറ്റ് കാർഡുകൾ ജൂൺ 14-നകം പുറത്തിറക്കുമെന്നും, ചോദ്യപേപ്പർ ചോർന്നതായി അധികൃതർ കണ്ടെത്തിയതിനെത്തുടർന്ന് റദ്ദാക്കിയ പഴയ പരീക്ഷയുടെ പുനഃപരീക്ഷ ജൂൺ 21 ന് നടത്തുമെന്നും അദ്ദേഹം സ്ഥിരീകരിച്ചു.

മെയ് മൂന്നിന് നടത്തിയ ഈ വർഷത്തെ നീറ്റ് യുജി പരീക്ഷയിൽ ചോദ്യപേപ്പറുമായി ബന്ധപ്പെട്ട് ക്രമക്കേട് നടന്നതിനാൽ മെയ് ഏഴിന് പരാതികൾ പുറത്തുവന്നെന്നും തുടർന്ന് അവ കേന്ദ്ര സർക്കാർ ഏജൻസികൾക്ക് കൈമാറിയെന്നും അദ്ദേഹം പറഞ്ഞു. ദിവസങ്ങൾക്കകം, ചോർച്ച അധികൃതർ സ്ഥിരീകരിച്ചു.

'ചോദ്യപേപ്പർ ചോർച്ചയെക്കുറിച്ച് സ്ഥിരീകരിച്ചപ്പോൾ, വിദ്യാർത്ഥികളുടെ ന്യായമായ അവസരത്തിൽ യാതൊരു വിട്ടുവീഴ്ചയും പാടില്ലെന്ന് ഉടൻ തീരുമാനിച്ചു, മെയ് 12 ന് പരീക്ഷ റദ്ദാക്കി.  സമാനമായ ഒരു സാഹചര്യമാണ് മുമ്പ് രാധാകൃഷ്ണൻ കമ്മിറ്റിയുടെ രൂപീകരണത്തിന് കാരണമായതെന്ന് മുമ്പത്തെ സംഭവങ്ങൾ ഓർമിപ്പിച്ചുകൊണ്ട് മന്ത്രി പറഞ്ഞു. പരീക്ഷാ ക്രമക്കേടുകളോട് സർക്കാർ സഹിഷ്ണുത കാണിക്കില്ലെന്നും അത് തുടരുമെന്നും അദ്ദേഹം പറഞ്ഞു.

'ക്രമക്കേടുകൾക്കും സാമൂഹ്യവിരുദ്ധ ഘടകങ്ങൾക്കുമെതിരെ ഞങ്ങളുടെ സഹിഷ്ണുത കാണിക്കില്ല. സാങ്കേതികവിദ്യയുടെ വളർച്ചയോടെ, ഇത്തരം വെല്ലുവിളികൾ ഉയർന്നുവരികയാണ്. വിദ്യാർത്ഥികളുടെ ഭാവിയുമായി ബന്ധപ്പെട്ട് യാതൊരു വിട്ടുവീഴ്ചയും ഞങ്ങൾ അനുവദിക്കില്ല,' മന്ത്രി പറഞ്ഞു.

പരീക്ഷാ ശൃംഖലയിലെ ലംഘനം കണ്ടെത്താൻ സിബിഐ വിശദമായ അന്വേഷണം നടത്തുമെന്നും, പ്രശ്‌നത്തിന്റെ മൂലകാരണം കണ്ടെത്താൻ ഏജൻസികൾക്ക് നിർദേശം നൽകിയിട്ടുണ്ടെന്നും ധർമ്മേന്ദ്ര പ്രധാൻ പറഞ്ഞു. ക്രമക്കേടുകളിൽ ഉൾപ്പെട്ടവർക്കെതിരെ കർശന നടപടിയെടുക്കുമെന്നും, പരീക്ഷാ സമ്പ്രദായത്തെ ദുർബലപ്പെടുത്താനുള്ള ഏതൊരു ശ്രമത്തിനും ഗുരുതരമായ പ്രത്യാഘാതങ്ങൾ നേരിടേണ്ടി വരുമെന്നും അദ്ദേഹം മുന്നറിയിപ്പ് നൽകി.

സുപ്രീംകോടതിയുടെ ശുപാർശ പ്രകാരം രൂപീകരിച്ച എൻടിഎ തുടർച്ചയായ പരിഷ്‌കാരങ്ങൾക്ക് വിധേയമാകുന്നുണ്ടെന്നും, മെച്ചപ്പെടുത്തലുകൾക്കായി നിരവധി നിർദേശങ്ങൾ ലഭിച്ചിട്ടുണ്ടെന്നും മന്ത്രി കൂട്ടിച്ചേർത്തു. 'പിഴവുകളില്ലാത്ത' പരീക്ഷകൾ ഉറപ്പാക്കാൻ സമ്പ്രദായം കൂടുതൽ ശക്തിപ്പെടുത്തേണ്ടതിന്റെ ആവശ്യകത അദ്ദേഹം സമ്മതിച്ചു. റദ്ദാക്കിയ നീറ്റ് പരീക്ഷയുടെ ഫീസ് തിരികെ നൽകുമെന്നും, വരാനിരിക്കുന്ന പുനഃപരീക്ഷ സൗജന്യമായിരിക്കുമെന്നും മന്ത്രി കൂട്ടിച്ചേർത്തു.

പരീക്ഷയ്ക്ക് ഒരാഴ്ച മുമ്പ് വിദ്യാർത്ഥികൾക്ക് ഇഷ്ടമുള്ള കേന്ദ്രം തിരഞ്ഞെടുക്കാൻ എൻടിഎ അനുവദിക്കുമെന്നും, കാലാവസ്ഥാ സാഹചര്യങ്ങൾ പരിഗണിച്ച് യാത്രാ സൗകര്യങ്ങൾ ഏർപ്പെടുത്തുമെന്നും മന്ത്രി പറഞ്ഞു.