സംസ്ഥാനത്ത് മധ്യവേനലവധി ക്ലാസുകൾക്ക്​ കർശന വിലക്ക്

തിരുവനന്തപുരം: മധ്യവേനലവധിക്കാലത്ത്​ സ്കൂൾ ക്ലാസുകൾ കർശനമായി വിലക്കി പൊതുവിദ്യാഭ്യാസ വകുപ്പ്. എൽ.പി മുതൽ ഹയർ സെക്കൻഡറി വരെയുള്ള സർക്കാർ, എയ്​ഡഡ്​, അൺഎയ്​ഡഡ്​ ഉൾപ്പെടെ എല്ലാ സ്കൂളുകൾക്കും വിലക്ക്​ ബാധകമാണ്. സി.ബി.എസ്.ഇ, ഐ.സി.എസ്​.ഇ സ്‌കൂളുകൾക്കും ഉത്തരവ് ബാധകമാണ്​. ഉത്തരവ് നടപ്പാക്കുന്നുണ്ടോയെന്ന് ഉറപ്പാക്കാൻ വിദ്യാഭ്യാസ ഓഫിസർക്ക് പൊതുവിദ്യാഭ്യാസ ഡയറക്ടർ നിർദേശം നൽകി.

മധ്യവേനലവധിക്ക്​ ക്ലാസ്​ നടത്തുന്നതു​വഴി ക്ലാസിലോ യാത്രക്കിടയിലോ കുട്ടികൾക്ക്​ വേനൽച്ചൂട്​ മൂലം സംഭവിക്കുന്ന അത്യാഹിതങ്ങൾക്ക്​ സ്കൂൾ അധികാരികൾ, പ്രധാനാധ്യാപകർ, അധ്യാപകർ എന്നിവർ വ്യക്തിപരമായി ഉത്തരവാദികളായിരിക്കും. നിർദേശങ്ങൾ ലംഘിക്കുന്നവർക്കെതിരെ അച്ചടക്ക നടപടി സ്വീകരിക്കാൻ വിദ്യാഭ്യാസ ഓഫിസർമാർക്കും നിർദേശമുണ്ട്​.

വേനലവധിക്ക് കുട്ടികളെ പഠനത്തിനും പഠന ക്യാമ്പുകൾക്കും നിർബന്ധിക്കരുതെന്നാണ് പൊതുവിദ്യാഭ്യാസ വകുപ്പ്​ ഉത്തരവ്. പൊതുവിദ്യാഭ്യാസ ഡയറക്ടർ മറ്റ്​ ഉത്തരവുകൾ പുറപ്പെടുവിക്കാത്തപക്ഷം സ്കൂളുകൾ മാർച്ച് മാസത്തെ അവസാന പ്രവൃത്തിദിനത്തിൽ അടക്കേണ്ടതും ജൂണിലെ ആദ്യ പ്രവൃത്തി ദിനത്തിൽ തുറക്കേണ്ടതുമാണ്.