മൈക്രോ ഫിനാന്‍സ് തട്ടിപ്പ് കേസ്: വെള്ളാപ്പള്ളി നടേശന്‍ അടക്കമുള്ളവരെ പ്രോസിക്യൂട്ട് ചെയ്യാന്‍ അനുമതി വേണ്ടെന്ന് ഹൈക്കോടതി

കൊച്ചി: മൈക്രോ ഫിനാന്‍സ് തട്ടിപ്പ് കേസില്‍ വെള്ളാപ്പള്ളി നടേശന് തിരിച്ചടി. വെള്ളാപ്പള്ളി നടേശന്‍ അടക്കമുള്ളവരെ പ്രോസിക്യൂട്ട് ചെയ്യാന്‍ അനുമതി വേണ്ടെന്ന് ഹൈക്കോടതി സിംഗിള്‍ ബെഞ്ച് ഉത്തരവ്. സര്‍ക്കാര്‍ വാദം കോടതി അംഗീകരിച്ചു. ജസ്റ്റിസ് ബദറുദ്ദീന്റെ ബെഞ്ചാണ് വിധി പറഞ്ഞത്.

കേസിലെ വെള്ളാപ്പള്ളി നടേശനടക്കമുള്ള പ്രതികള്‍ ആരും തന്നെ പൊതുകാര്യാലയങ്ങള്‍ കൈകാര്യം ചെയ്യുന്ന ആളുകളല്ല. അതുകൊണ്ടുതന്നെ പ്രോസിക്യൂഷന്‍ അനുമതി വേണ്ട എന്നായിരുന്നു സര്‍ക്കാര്‍ വ്യക്തമാക്കിയത്.

കേസുമായി ബന്ധപ്പെട്ട് വളരെ പ്രധാനപ്പെട്ട ഉത്തരവാണിത്. ഇതുമായി ബന്ധപ്പെട്ട കേസുകളിലും കുറ്റപത്രം തയാറായിട്ടുണ്ടെങ്കിലും പ്രോസിക്യൂഷന്‍ അനുമതിയുമായി ബന്ധപ്പെട്ട തര്‍ക്കമുള്ളതിനാല്‍ കോടതി സമര്‍പ്പിക്കാന്‍ ആയിട്ടുണ്ടായിരുന്നില്ല.

പ്രോസിക്യൂട്ട് ചെയ്യാന്‍ അനുമതി വേണ്ടെന്ന് വ്യക്തമായതോടെ കേസിലെ എട്ടോളം കുറ്റപത്രങ്ങള്‍ ഇനി കോടതിയിലേക്ക് വരും. വിചാരണ നടപടിയിലേക്ക് പോകുന്നതില്‍ ഇനി തടസമൊന്നുമില്ല.