കൊച്ചിയിൽ 12,000 കോടി വിലമതിക്കുന്ന മെതാംഫെറ്റാമിൻ പിടികൂടി

കൊച്ചി: 12,000 കോടി രൂപ വിലമതിക്കുന്ന 2500 കിലോഗ്രാം മെതാംഫെറ്റാമിൻ എന്ന മയക്കുമരുന്ന്​ നാവിക സേനയും നാർകോട്ടിക്​ കൺട്രോൾ ബ്യൂറോയും ചേർന്ന്​ കൊച്ചി തീരത്തുന്നിന്ന്​ പിടികൂടി. ഇത്​ കടത്തുകയായിരുന്ന സ്പീഡ്​ ബോട്ട്​ ഓടിച്ചിരുന്ന പാകിസ്താനിയെന്ന്​ സംശയിക്കുന്നയാളെയും പിടികൂടിയിട്ടുണ്ട്​.

രാജ്യംകണ്ട ഏറ്റവും വലിയ മയക്കുമരുന്ന്​ വേട്ടയാണിതെന്ന്​ മയക്കുമരുന്ന്​ കടത്ത്​ കണ്ടെത്താൻ ആരംഭിച്ച ഓപറേഷൻ സമുദ്രഗുപ്ത് പദ്ധതിയുടെ ഡെപ്യൂട്ടി ഡയറക്ടർ ജനറൽ (ഒപറേഷൻസ്​) സഞ്ജയ് കുമാർ സിങ്​ വാർത്തസമ്മേളനത്തിൽ പറഞ്ഞു.

കലർപ്പില്ലാത്ത മയക്കുമരുന്ന്​ പാകിസ്താനിൽനിന്ന്​ ശ്രീലങ്കയിലേക്ക്​ കടത്തുകയായിരുന്നു എന്നാണ്​ കരുതുന്നത്​. സംഭവത്തിൽ കൂടുതൽ അന്വേഷണം നടത്തിവരുകയാണ്​. നാർകോട്ടിക്​ കൺട്രോൾ ബ്യൂറോയും (എൻ.സി.ബി) ഇന്ത്യൻ നേവിയും സംയുക്തമായി നടത്തിയ പ്രവർത്തന ഫലമായാണ്​ ഇത്രയും വലിയ മയക്കുമരുന്ന്​ ശേഖരം പിടികൂടാനായതെന്ന്​ സഞ്ജയ് കുമാർ സിങ്​ പറഞ്ഞു.

പാകിസ്താനിലെ മക്രാൻ തീരത്തുനിന്ന് വൻതോതിൽ മെതാംഫെറ്റാമിൻ വഹിച്ച്​ കപ്പൽ പുറപ്പെട്ടതായി വിവരം ലഭിച്ചിരുന്നു. ഇതനുസരിച്ച്​ നടത്തിയ സൂക്ഷ്മ നിരീക്ഷണത്തിൽ കപ്പൽ പോകാൻ സാധ്യതയുള്ള റൂട്ട് തിരിച്ചറിയാൻ സാധിച്ചു. അതനുസരിച്ച് നാവികസേനയും നാവിക കപ്പലും സംയുക്തമായി നടത്തിയ തിരച്ചിലിലാണ്​ കപ്പൽ കണ്ടെത്തിയത്​.

കപ്പലിൽനിന്ന് 134 ചാക്ക് മെതാംഫെറ്റാമിനാണ്​ കണ്ടെടുത്തത്​. കപ്പലിൽനിന്ന്​ കണ്ടെടുത്ത ചാക്കു​കെട്ടുകളും മറ്റ് ചില വസ്തുക്കളും ശനിയാഴ്ച കൊച്ചി മട്ടാഞ്ചേരി വാർഫിൽ എത്തിച്ച് നാർകോട്ടിക്​ ബ്യൂറോക്ക്​ കൈമാറി.