.jpg)
ഓണം ബംപര് അടിച്ചില്ല; ലോട്ടറി വില്പ്പനക്കാരിയെ കുത്തിപ്പരിക്കേല്പ്പിച്ചു
വിനീതയുടെ കഴുത്തിലും തലയിലും ഒട്ടേറെ പ്രാവശ്യം കുത്തേറ്റിട്ടുണ്ട്. നിലവിളി കേട്ട് ഓടിയെത്തിയ നാട്ടുകാരാണ് യുവതിയെ പരിക്കേറ്റ നിലയില് കണ്ടത്
കല്പ്പറ്റ: ഓണം ബംപര് ലോട്ടറി അടിക്കാത്തതിന്റെ ദേഷ്യത്തിനു ലോട്ടറി വില്പ്പനക്കാരിയെ കുത്തി പരിക്കേല്പ്പിച്ചു. വയനാട് നെന്മേനിയില് ലോട്ടറി വില്പന നടത്തുന്ന വിനീത രജീഷിനാണ് ഗുരുതരമായി കുത്തേറ്റത്.
ഞായറാഴ്ച ഉച്ചയോടെയാണ് സംഭവം. നമ്പ്യാര്കുന്നില് പൂങ്കാവനം ലോട്ടറി എന്ന പേരില് ലോട്ടറി വ്യാപാരം നടത്തുന്ന വിനീത രജീഷിന്റെ കടയില് നിന്നുമാണ് ശിവകുമാര് സ്ഥിരമായി ടിക്കറ്റ് വാങ്ങിയിരുന്നത്.ഒന്നും അടിച്ചില്ലെന്ന നിരാശയില് വിനീതയുമായി വഴക്കിട്ടു.തുടര്ന്നാണ് ആക്രമണം. ഒളിപ്പിച്ച കത്തിയെടുത്ത് യുവതിയെ കുത്തുകയായിരുന്നു എന്ന് പൊലീസ് പറയുന്നു.
വിനീതയുടെ കഴുത്തിലും തലയിലും ഒട്ടേറെ പ്രാവശ്യം കുത്തേറ്റിട്ടുണ്ട്. നിലവിളി കേട്ട് ഓടിയെത്തിയ നാട്ടുകാരാണ് യുവതിയെ പരിക്കേറ്റ നിലയില് കണ്ടത്. സ്ഥലത്തുനിന്നും ഓടി രക്ഷപ്പെടാന് ശ്രമിച്ച ശിവകുമാറിനെ നാട്ടുകാര് തടഞ്ഞുവച്ച് നൂല്പ്പുഴ പൊലീസിനു കൈമാറി. ഗുരുതരമായി പരിക്കേറ്റ വിനീതയെ ബത്തേരി ആശുപത്രിയില് പ്രവേശിപ്പിച്ചു. സംഭവത്തില് തമിഴ്നാട് പാട്ടവേല് സ്വദേശി ശിവകുമാറിനെ ബത്തേരി പൊലീസ് കസ്റ്റഡിയില് എടുത്തു.
