മുഖ്യമന്ത്രിയോട് പതിനൊന്ന് ചോദ്യങ്ങളുമായി കെഎസ്ഇബി മുൻ എക്സിക്യൂട്ടീവ് എഞ്ചിനീയർ എം ജി സുരേഷ് കുമാർ

 തിരുവനന്തപുരം: മുഖ്യമന്ത്രിയോട് പതിനൊന്ന് ചോദ്യങ്ങളുമായി കെഎസ്ഇബി മുൻ എക്സിക്യൂട്ടീവ് എഞ്ചിനീയർ എം ജി സുരേഷ് കുമാർ. ജിഎൻഎ കരാറിൽ മുഖ്യമന്ത്രിയുടെ ന്യായീകരണത്തിനു പിന്നിൽ മറ്റ് താല്പര്യങ്ങൾ എന്ന് സംശയമെന്നും എം ജി സുരേഷ് കുമാർ ഫേസ്ബുക്ക് പോസ്റ്റിലൂടെ കുറ്റപ്പെടുത്തിയിട്ടുണ്ട്. കരാർ സംബന്ധിച്ച ചില ചോദ്യങ്ങൾക്ക് മുഖ്യമന്ത്രി മറുപടി പറയണമെന്ന് ഫേസ്ബുക്ക് പോസ്റ്റിൽ ആവശ്യപ്പെട്ടിട്ടുണ്ട്.

എം ജി സുരേഷ് കുമാർ ഫേസ്ബുക്ക് പോസ്റ്റിൽ ഉന്നയിച്ച ചോദ്യങ്ങൾ

    രാജമാണിക്യം ഐ.എ.എസ്. ജി.എൻ.എ. വിഷയത്തിൽ വിയോജിപ്പ് രേഖപ്പെടുത്തിയിട്ടില്ലെന്നാണ് മുഖ്യമന്ത്രി പറയുന്നത്. അതു ശരിയാണെങ്കിൽ ഈ കരാർ ഉണ്ടാക്കുന്ന നഷ്ടം സംബന്ധിച്ച് കെ.എസ്.ഇ.ബി. സർക്കാരിന് നൽകിയ റിപ്പോർട്ടുകൾ എവിടെപ്പോയി? ആരാണ് ആ റിപ്പോർട്ടുകൾ മുക്കിയത്?

രാജമാണിക്യം ഐ.എ.എസ്. വിയോജിപ്പ് രേഖപ്പെടുത്തിയിട്ടില്ലെങ്കിൽ, ജി.എൻ.എ. വിഷയവുമായി ബന്ധപ്പെട്ട മുഴുവൻ ഫയലുകളും, രാജമാണിക്യത്തിന്റെ കുറിപ്പുകളും അടങ്ങിയ ഫയൽ ഉടൻ പുറത്തുവിടാൻ സർക്കാർ തയ്യാറാണോ?

കെ.എസ്.ഇ.ബി.യുടെ ചീഫ് എൻജിനീയറുടെ റിപ്പോർട്ട് പ്രകാരം ഹിമാചൽ സംവിധാനത്തിലൂടെ പീക്ക് സമയത്ത് 864 മുതൽ 1280 മെഗാവാട്ട് വരെ വൈദ്യുതി ലഭിക്കുമ്പോൾ ജി.എൻ.എ. ഓഫർ 500 മെഗാവാട്ടിൽ പരിമിതപ്പെടുന്നു. എന്നാൽ ജി.എൻ.എ. കൂടുതൽ പീക്ക് വൈദ്യുതി നൽകുമെന്ന മുഖ്യമന്ത്രിയുടെ വാദത്തിന്റെ അടിസ്ഥാന രേഖ എന്താണ്?

കെ.എസ്.ഇ.ബിയോ റഗുലേറ്ററി കമ്മീഷനോ നൽകാത്ത ഒരു കണക്ക് ബഹു മുഖ്യമന്ത്രിക്ക് എവിടെ നിന്നാണ് കിട്ടിയത്? അതിന്റെ അടിസ്ഥാനമെന്താണ്?

ഹിമാചൽ ഓഫർ സ്വീകരിച്ചിരുന്നെങ്കിൽ 2000 കോടിയിലധികം രൂപയുടെ ബാധ്യത വരുമെന്നു മുഖ്യമന്ത്രി പറഞ്ഞു. എന്നാൽ കെ.എസ്.ഇ.ബി.യുടെ കണക്ക് പ്രകാരം ഹിമാചൽ സംവിധാനത്തിന്റെ ചെലവ് 1105 കോടി രൂപ മാത്രമാണ്. യൂണിറ്റിന് 14.50 രൂപ നിരക്കായാലും 1281 കോടി രൂപ മാത്രമേ ആകൂ. 1281 കോടി രൂപ കൊടുക്കുമ്പോൾ എങ്ങിനെയാണ് 2000 കോടിയിലധികം നഷ്ടം വരുക. മറിച്ച് ജി.എൻ.എ. ഓഫറും അതുമൂലമുണ്ടാകുന്ന അധിക പീക്ക് വൈദ്യുതി വാങ്ങലും ചേർന്നാൽ 2008 കോടി രൂപയ്ക്ക് മുകളിലാണ് ചെലവ്. അപ്പോൾ മുഖ്യമന്ത്രിയുടെ എങ്ങിനെയാണ് ജി.എൻ.എ. ലാഭവും ഹിമാചൽ നഷ്ടവും ആകുന്നത്?

കേരള സ്റ്റേറ്റ് ഇലക്ട്രിസിറ്റി റെഗുലേറ്ററി കമ്മീഷന്റെ വിലയിരുത്തൽ പ്രകാരംസർക്കാർ അവകാശപ്പെടുന്നതുപോലെ സംസ്ഥാനം രൂക്ഷമായ വൈദ്യുതി പ്രതിസന്ധി നേരിടുന്നില്ല. അങ്ങനെയിരിക്കെ അധിക വൈദ്യുതി വാങ്ങാൻ സർക്കാർ ഇത്ര അസാധാരണമായ താൽപര്യം കാണിക്കുന്നത് എന്തിനാണ്?

വൈദ്യുതി നിയമത്തിലെ സെക്ഷൻ 62, 63 പ്രകാരം ടെണ്ടറിലൂടെയോ റെഗുലേറ്ററി കമ്മീഷൻ അംഗീകരിച്ച സംവിധാനത്തിലൂടെയോ മാത്രമേ വില നിർണയിക്കാനാകൂ. ജി.എൻ.എ. ഓഫറിലെ 8.63 രൂപ നിരക്ക് ഏത് നിയമപരമായ വിലനിർണയ സംവിധാനത്തിന്റെ അടിസ്ഥാനത്തിലാണ് നിശ്ചയിക്കപ്പെട്ടത്?

 നിയമത്തിൽ വ്യവസ്ഥയില്ലാതെ വൈദ്യുതി വാങ്ങാൻ വൈദ്യുതി നിയമത്തിലെ സെക്ഷൻ 108 പ്രകാരം നയപരമായ നിർദ്ദേശം കൊടുക്കുമെന്ന മുഖ്യമന്ത്രിയുടെ പ്രസ്താവന നിലനിൽക്കുമോ? ഒരു നിയമത്തിലെ ഏതെങ്കിലും സെക്ഷനിലെ വ്യവസ്ഥകളെ മറ്റൊരു സെക്ഷൻ ഉപയോഗിച്ച് മറികടക്കാൻ കഴിയുമോ? സെക്ഷൻ 108 സംബന്ധിച്ച് സുപ്രീം കോടതിയടക്കം നടത്തിയിട്ടുള്ള റൂളിംഗിന് വിരുദ്ധമായി എങ്ങിനെയാണ് സർക്കാരിന് പ്രവർത്തിക്കാനാകുക?

ജി.എൻ.എ. ഒരു വൈദ്യുതി ഉൽപാദന കമ്പനിയല്ല, ലൈസൻസുള്ള വൈദ്യുതി ട്രേഡറുമല്ല. ഒരു ഒ.ടി.സി. ഡിജിറ്റൽ പ്ലാറ്റ്ഫോം മാത്രമാണ്. അപ്പോൾ ജി.എൻ.എ.യുടെ പേരിൽ എങ്ങിനെയാണ് വൈദ്യുതി ഓഫർ ചെയ്യുക്? അതിന് അവർക്ക് നിയമപരമായി എന്ത് അധികാരമാണുള്ലത്? ഈ ഓഫറിന് പിന്നിലെ യഥാർത്ഥ ജനറേറ്റർ ആരാണ്? ആ വിവരം എന്തുകൊണ്ടാണ് ഇതുവരെ വെളിപ്പെടുത്താത്തത്?

യഥാർത്ഥ ജനറേറ്ററുടെ പേര് വ്യക്തമല്ല, ടെണ്ടർ നടന്നിട്ടില്ല, റെഗുലേറ്ററി കമ്മീഷന്റെ മുൻകൂർ അംഗീകാരം ഇല്ല, കെ.എസ്.ഇ.ബി. സാമ്പത്തിക നഷ്ടം ചൂണ്ടിക്കാട്ടി എതിർക്കുന്നു. ഈ സാഹചര്യത്തിൽ ജി.എൻ.എ. ഓഫറിനെ പ്രതിരോധിക്കാൻ മുഖ്യമന്ത്രി തന്നെ നേരിട്ട് രംഗത്തിറങ്ങേണ്ട സാഹചര്യം എന്തുകൊണ്ടാണ് ഉണ്ടായത്?

ജി.എൻ.എ. ഒ.ടി.സി. കേന്ദ്ര റഗുലേറ്ററി കമ്മീഷന്റെ അഭ്യന്തര രേഖകൾ ദുരുപയോഗം ചെയ്തതിനാൽ അന്വേഷണവും നടപടികളും നേരിടുന്ന സ്ഥാപനമാണെന്ന് മുഖ്യമന്ത്രിക്കറിയുമോ? ഇങ്ങിനെ സംശയത്തിന്റെ നിഴലിൽ നിൽക്കുന്ന ഒരു കമ്പനിയുടെ ഓഫർ ന്യായീകരിക്കാൻ മുഖ്യമന്ത്രിക്കുള്ള ബാധ്യത എന്താണ്?