.jpg)
കോതമംഗലത്ത് കാട്ടാന മറിച്ചിട്ട പനമരം ദേഹത്ത് വീണ് വിദ്യാര്ഥിനിക്ക് ദാരുണാന്ത്യം
Dec 15, 2024, 10:25 IST
കൊച്ചി : കോതമംഗലം നേര്യമംഗലം ചെമ്പന്കുഴിയില് കാട്ടാന റോഡിലേക്ക് പന മറിച്ചിട്ടുണ്ടായ അപകടത്തില് ബൈക്ക് യാത്രക്കാരിയായ വിദ്യാര്ഥിനി മരിച്ചു. കോതമംഗലം മാര് അത്തനേഷ്യസ് എന്ജിനീയറിങ് കോളജ് വിദ്യാര്ത്ഥിയായ പാലക്കാട് കഞ്ചിക്കോട് സ്വദേശി ആന്മേരിയാണ് മരിച്ചത്. സഹപാഠിയുമായി ബൈക്കില് സഞ്ചരിക്കുമ്പോള് നീണ്ടപാറ ചെമ്പന്കുഴി ഭാഗത്ത് വെച്ച് കാട്ടാന പിഴുതിട്ട പനമരം ഇരുവരുടെയും ദേഹത്തേക്ക് വീഴുകയായിരുന്നു.
നാട്ടുകാരും ഫോറസ്റ്റ് ഉദ്യോഗസ്ഥരും ചേര്ന്ന് കോതമംഗലത്തെ ആശുപത്രിയിലെത്തിച്ചെങ്കിലും ആന്മേരിയുടെ ജീവന് രക്ഷിക്കാനായില്ല. പരുക്കേറ്റ കോതമംഗലം അടിവാട് സ്വദേശിയായ അല്ത്താഫ് കോതമംഗലം മാര് ബസേലിയോസ് മിഷന് ആശുപത്രിയില് ചികിത്സയിലാണ്. ആന്മേരിയുടെ മൃതദേഹം പോസ്റ്റ്മോര്ട്ടത്തിനായി കളമശേരി മെഡിക്കല് കോളജ് ആശുപത്രിയിലേക്ക് മാറ്റി.
