ആശങ്കപ്പെടേണ്ട ; സംസ്ഥാനത്ത് ഇന്ന് മഴ മുന്നറിയിപ്പുകളില്ല

 സംസ്ഥാനത്ത് ഇന്ന് ആശങ്കപ്പെടേണ്ട മഴ മുന്നറിയിപ്പുകളില്ല. ഇന്ന് കേരളത്തിലെ പതിനാല് ജില്ലകളിലും ഗ്രീൻ അലേർട്ടാണ് പ്രഖ്യാപിച്ചിരിക്കുന്നത്. എങ്കിലും സംസ്ഥാനത്ത് വിവിധ ജില്ലകളിൽ ഒറ്റപ്പെട്ടയിടങ്ങളിൽ നേരിയ മഴയ്ക്ക് സാധ്യതയുണ്ടെന്ന് കേന്ദ്ര കാലവസ്ഥാ വകുപ്പ് മുന്നറിയിപ്പ് നൽകുന്നു. കോട്ടയം, കണ്ണൂർ, കാസർഗോഡ് ജില്ലകളിലാണ് ഒറ്റപ്പെട്ടയിടങ്ങളിൽ നേരിയ മഴയ്ക്ക് സാധ്യത പ്രവചിച്ചിരിക്കുന്നത്.

നിലവിലെ വിവരങ്ങൾ പ്രകാരം സെപ്റ്റംബർ 4 വരെ സംസ്ഥനത്തെ എല്ലാ ജില്ലകളിലും ഗ്രീൻ അലേർട്ട് തന്നെയാണ് നൽകിയിരിക്കുന്നത്. കഴിഞ്ഞ 24 മണിക്കൂറിനിടെ സംസ്ഥാനത്ത് നേരിയ മഴ മാത്രമേ റിപ്പോർട്ട് ചെയ്തിട്ടൊള്ളു എന്ന് കേന്ദ്ര കാലവസ്ഥ വകുപ്പ് പുറത്തുവിട്ട വിവരങ്ങളിൽ നിന്നും വ്യക്തമാണ്. കാസർഗോഡ് ജില്ലയുടെ വിവിവിധ മേഖലകളിലാണ് മിതമായ രീതിയിൽ മഴ ലഭിച്ചത്. മലപ്പുറം, പാലക്കാട്, പത്തനംതിട്ട, ഇടുക്കി കോട്ടയം എന്നീ ജില്ലകളിൽ മഴ തീരെ കുറവായിരുന്നു. മറ്റു ജില്ലകളിൽ നേരിയ മഴ ലഭിച്ചതായും കേന്ദ്ര കാലാവസ്ഥ വകുപ്പ് പുറത്തുവിട്ട വിവരങ്ങളിൽ നിന്നും വ്യക്തമാണ്. ഇതേ അന്തരീക്ഷം വരും ദിവസങ്ങളിലും തുടരാനാണ് സാധ്യത.