സംസ്ഥാനത്ത് കാലവർഷം വൈകുന്നു ; ആശങ്കയായി ‘എൽ നിനോ’ പ്രതിഭാസം

 കേരളത്തിൽ ഇത്തവണ നേരത്തെ കാലവർഷം എത്തുമെന്ന പ്രതീക്ഷകൾ അസ്ഥാനത്താക്കി കാലവർഷത്തിന്റെ വരവ് വൈകുന്നു. സാധാരണയായി ജൂൺ ഒന്നിന് രാജ്യത്ത് കാലവർഷം ആരംഭിക്കാറുള്ളത്. മെയ് 26-ഓടെ മൺസൂൺ കേരളത്തിൽ എത്തുമെന്നായിരുന്നു കേന്ദ്ര കാലാവസ്ഥാ വകുപ്പിന്റെ നേരത്തെയുള്ള പ്രവചനം. എന്നാൽ, അനുകൂലമായ അന്തരീക്ഷ സാഹചര്യങ്ങൾ രൂപപ്പെടാത്തതിനാൽ പ്രവചിച്ച തീയതിയിലും കടന്ന് കാലവർഷം നീളുകയായിരുന്നു. നിലവിലെ റിപ്പോർട്ടുകൾ പ്രകാരം, ജൂൺ ആദ്യ വാരത്തിൽ, അതായത് ഒന്നോ രണ്ടോ ദിവസങ്ങൾക്കുള്ളിൽ കാലവർഷം കേരളത്തിൽ ഔദ്യോഗികമായി പ്രഖ്യാപിക്കുമെന്നാണ് കാലാവസ്ഥാ നിരീക്ഷകർ കണക്കാക്കുന്നത്.

കാലവർഷത്തിന്റെ വരവ് ഔദ്യോഗികമായി പ്രഖ്യാപിക്കുന്നതിന് നിശ്ചിത മാനദണ്ഡങ്ങൾ പാലിക്കേണ്ടതുണ്ട്. കേരളത്തിലെ 14 നിരീക്ഷണ കേന്ദ്രങ്ങളിൽ 60 ശതമാനത്തിലധികം ഇടങ്ങളിൽ തുടർച്ചയായി രണ്ട് ദിവസം 2.5 മില്ലിമീറ്ററോ അതിൽ കൂടുതലോ മഴ രേഖപ്പെടുത്തണം. ഇതിനൊപ്പം കാറ്റിന്റെ വേഗത, മേഘങ്ങളുടെ സാന്നിധ്യം എന്നിവയും നിർണ്ണായകമാണ്. ഈ മാനദണ്ഡങ്ങൾ പൂർത്തിയാകാത്തതാണ് കാലവർഷ പ്രഖ്യാപനം വൈകാൻ കാരണം. അതേസമയം, സംസ്ഥാനത്ത് പലയിടത്തും ഒറ്റപ്പെട്ട തോതിൽ മഴ ലഭിക്കുന്നുണ്ടെങ്കിലും, കാലവർഷത്തിന്റെ വരവിനായുള്ള കാത്തിരിപ്പ് തുടരുകയാണ്.

ഇത്തവണത്തെ കാലവർഷത്തിൽ മഴ കുറയാൻ സാധ്യതയുണ്ടെന്ന മുന്നറിയിപ്പും കാലാവസ്ഥാ വകുപ്പ് നൽകിയിട്ടുണ്ട്. ഇതിന് പ്രധാന കാരണമായി ചൂണ്ടിക്കാട്ടുന്നത് എൽ നിനോ പ്രതിഭാസമാണ്. പസഫിക് സമുദ്രത്തിലെ ജലത്തിന്റെ താപനിലയിലുണ്ടാകുന്ന വ്യതിയാനം ഇന്ത്യയിലെ മഴയെ പ്രതികൂലമായി ബാധിക്കാൻ സാധ്യതയുണ്ടെന്നാണ് ഐഎംഡിയുടെ വിലയിരുത്തൽ. ദീർഘകാല ശരാശരിയുടെ 90 ശതമാനം മഴ മാത്രമാണ് ഇത്തവണ രാജ്യത്ത് ലഭിക്കാൻ സാധ്യതയുള്ളത്. ഇത് കാർഷിക മേഖലയെയും ജലസ്രോതസ്സുകളെയും സംബന്ധിച്ച് വലിയൊരു വെല്ലുവിളിയായി മാറുമെന്ന ആശങ്കയും നിലനിൽക്കുന്നുണ്ട്.