കേരളത്തിൽ കാലവർഷം നേരത്തെ എത്തുന്നു ; മെയ് 25-ഓടെ മഴയ്ക്ക് സാധ്യത

 രാജ്യത്ത് കടുത്ത ചൂട് തുടരുന്നതിനിടെ ആശ്വാസവാർത്തയുമായി കാലാവസ്ഥാ പ്രവചനം. ഇത്തവണ തെക്കുപടിഞ്ഞാറൻ കാലവർഷം നിശ്ചയിച്ചതിലും നേരത്തെ എത്തുമെന്നാണ് യൂറോപ്യൻ സെന്റർ ഫോർ മീഡിയം-റേഞ്ച് വെതർ ഫോർകാസ്റ്റ്‌സിന്റെ പുതിയ റിപ്പോർട്ടുകൾ സൂചിപ്പിക്കുന്നത്. നിലവിൽ ഉത്തരേന്ത്യയിലും മധ്യ ഇന്ത്യയിലും താപനില 44 ഡിഗ്രി സെൽഷ്യസ് വരെ ഉയർന്നു നിൽക്കുന്ന സാഹചര്യത്തിൽ, മെയ് അവസാനത്തോടെ ദക്ഷിണേന്ത്യയിൽ മഴയെത്തുന്നത് വലിയ ആശ്വാസമാകും.

അന്തരീക്ഷ സാഹചര്യങ്ങൾ അനുകൂലമാണെങ്കിൽ മെയ് 25-ഓടെ കേരളത്തിൽ കാലവർഷം എത്തിയേക്കുമെന്നാണ് കാലാവസ്ഥാ വിദഗ്ധരുടെ നിരീക്ഷണം. അൻഡമാൻ നിക്കോബാർ ദ്വീപുകളിൽ മെയ് 18-നും 25-നും ഇടയിൽ മഴയെത്താൻ സാധ്യതയുണ്ട്. സാധാരണയായി ജൂൺ ഒന്നിന് എത്താറുള്ള കാലവർഷം ഇത്തവണ നേരത്തെയാകുന്നത് നിലവിലെ കടുത്ത ചൂട് കാരണം സമുദ്രത്തിൽ നിന്നുള്ള കാറ്റ് വേഗത്തിൽ കരയിലേക്ക് എത്തുന്നതിനാലാണെന്നും വിലയിരുത്തപ്പെടുന്നു.

ഇത്തവണ കാലവർഷത്തെ പ്രതികൂലമായി ബാധിക്കുന്ന എൽ നിനോ പ്രതിഭാസത്തിന്റെ ഭീഷണി ഉണ്ടാകില്ലെന്നതും പ്രതീക്ഷ വർദ്ധിപ്പിക്കുന്നു. പകരം ഇന്ത്യൻ മഹാസമുദ്രത്തിലെ താപനിലയിലുണ്ടാകുന്ന പോസിറ്റീവ് ഐ.ഒ.ഡി മഴയ്ക്ക് കരുത്തേകാനാണ് സാധ്യത. കഴിഞ്ഞ വർഷത്തെപ്പോലെ (2025) ഇത്തവണയും മഴ നേരത്തെ എത്തുന്നത് കാർഷിക മേഖലയ്ക്കും ചൂടിൽ വലയുന്ന ജനങ്ങൾക്കും ഒരുപോലെ ഗുണകരമാകും.