വോട്ടർമാരെ പത്തുകാര്യങ്ങൾ ഓർമിപ്പിച്ച് പിണറായിക്ക് ബൈ ബൈ പറഞ്ഞ് കെസി വേണുഗോപാൽ എംപി

ആലപ്പുഴ : പോളിംഗ് ബൂത്തിലേക്ക് പോകുന്ന ഒരോ മലയാളിയോടും പത്തുകാര്യങ്ങൾ ഓർമിപ്പിച്ച് എഐസിസി ജനറൽ സെക്രട്ടറി കെസി വേണുഗോപാൽ.  ഈ തിരഞ്ഞെടുപ്പ്  പിണറായി ഭരണത്തിന്റെ കലാശക്കൊട്ടും യുഡിഎഫ് സർക്കാരിന്റെ കേളികൊട്ടുമാണ് ചൂട്ടിക്കാട്ടിയ വേണുഗോപാൽ പത്തുവർഷത്തെ കിരാതഭരണത്തിൽനിന്ന് നാടിന് മോചനമാക്കാൻ ഐക്യ ജനാധിപത്യമുന്നണിയുടെ വിജയം സുനിശ്ചിതമാണെന്നും പറഞ്ഞു. ബിജെപിയുമായും മറ്റു ചില വർഗീയ സംഘടനകളുമായും സന്ധി ചെയ്ത് എങ്ങനെയും തുടർഭരണം നേടാനായിരുന്നു മുഖ്യമന്ത്രിയുടെ ശ്രമം. പക്ഷേ അത് കേരളത്തിൽ വിലപ്പോകില്ല. അത് അവർക്കും മനസ്സിലായിക്കഴിഞ്ഞു. അതിനാൽ ബൈ ബൈ പിണറായിയെന്നും കെസി വേണുഗോപാൽ ഫേയ്സ്ബുക്കിൽ കുറിച്ചു.

പിണറായി ഭരണത്തിൻ്റെ 'ആ 10' കാലം കഴിഞ്ഞെന്നും ഇനിയൊരു ആപത്തിന്  കേരള ജനത നിന്ന് കൊടുക്കില്ലെന്നും പറഞ്ഞ വേണുഗോപാൽ അതിനുള്ള 10 കാരണങ്ങൾ അക്കമിട്ട് നിരത്തുകയും ചെയ്യുന്നുണ്ട്. പിൻവാതിൽ നിയമനങ്ങൾ സ്ഥിരമാക്കും,   യുവതീപ്രവേശനം നടപ്പാക്കും, സർക്കാർ ആശുപത്രികളെ കൊലക്കളമാക്കും, സാമ്പത്തികരംഗം കൂപ്പുകുത്തും, ആർഭാടങ്ങളുടെ ആറാട്ട് തുടരും, നാട് കടുത്ത വിലക്കയറ്റം നേരിടും.

വീട്ടുകരം, വസ്തുക്കരം, വൈദ്യുതി ചാർജ്, ചികിത്സാനിരക്ക്, ബസ് കൂലി തുടങ്ങിയ എല്ലാ കരങ്ങളും നിരക്കുകളും  കുത്തനേ വർധിപ്പിച്ചുകൊണ്ടിരിക്കും.  മുഖ്യമന്ത്രിക്കെതിരേ അരഡസനിലധികം കേസുകൾക്ക് സാധ്യതയുണ്ടെങ്കിലും അവയെല്ലാം ചവിട്ടിയൊതുക്കുമെന്നു കെസി വേണുഗോപാൽ ചൂണ്ടിക്കാട്ടി. സഹകരണ പ്രസ്ഥാനങ്ങളെ തുടർന്നും  കൊള്ളയടിക്കും. വന്യജീവി ആക്രമണത്തിന് അറുതി ഉണ്ടാകില്ല. സർക്കാർ ആശുപത്രികൾ കൊലക്കളമായി തുടരും. സ്വന്തം പാർട്ടിക്കാർ പീഡനക്കേസിൽ ഉൾപ്പെടുന്നതുവരെ സ്ത്രീ സുരക്ഷ (ലവ് യു ടു ദ മൂൺ). പാർട്ടിക്കാരാണെങ്കിൽ ചായക്കപ്പ് എറിഞ്ഞുടയ്ക്കും. പിന്നെ പീഡകർക്ക് കവചമൊരുക്കുമെന്നും കെസി വേണുഗോപാൽ ചൂണ്ടിക്കാട്ടി.