.jpg)
ലോക്കപ്പുകളില് പ്രതികളെ അടിവസ്ത്രം മാത്രം ധരിപ്പിക്കല്; പൊലീസ് ഉദ്യോഗസ്ഥര്ക്കെതിരെ നടപടി സ്വീകരിക്കണമെന്ന് മനുഷ്യാവകാശ കമ്മീഷന്
തിരുവനന്തപുരം: സംസ്ഥാനത്തെ പൊലീസ് സ്റ്റേഷനുകളിലെ ലോക്കപ്പുകളില് പ്രതികളെ അടിവസ്ത്രം മാത്രം ധരിച്ച് നിർത്തുന്ന പൊലീസ് ഉദ്യോഗസ്ഥര്ക്കെതിരെ കര്ശന നടപടി സ്വീകരിക്കണമെന്ന് മനുഷ്യാവകാശ കമ്മിഷന് ചെയര്പേഴ്സണ് ജസ്റ്റിസ് അലക്സാണ്ടര് തോമസ് .ഇക്കാര്യത്തില് പൊലീസ് ആസ്ഥാനത്തുനിന്ന് നല്കിയ നിര്ദേശങ്ങള് പാലിക്കപ്പെടുന്നുണ്ടെന്ന് സംസ്ഥാന പൊലീസ് മേധാവി ഉറപ്പാക്കണമെന്നും കമ്മീഷന് നിര്ദേശിച്ചു. ലോക്കപ്പുകളില് അടിവസ്ത്രം മാത്രം ധരിക്കാന് അനുവദിക്കുന്നത് മനുഷ്യാവകാശങ്ങളുടെയും മൗലികാവകാശങ്ങളുടെയും ലംഘനമാണെന്ന് ആരോപിച്ച് സമര്പ്പിച്ച പരാതിയിലാണ് നടപടി.
ക്രമസമാധാനവിഭാഗം എഡിജിപിയില്നിന്ന് കമ്മീഷന് റിപ്പോര്ട്ട് വാങ്ങി. പ്രതികളുടെ മനുഷ്യാവകാശങ്ങളും മൗലികാവകാശങ്ങളും ലംഘിക്കുന്ന പ്രവൃത്തി പൊലീസ് സേനാംഗങ്ങളില്നിന്നും ഉണ്ടാകരുതെന്ന് പൊലീസ് ആസ്ഥാനത്തുനിന്ന് നിര്ദേശിച്ചിട്ടുണ്ടന്നും അദ്ദേഹം പറഞ്ഞു.
ഇതിനു വിരുദ്ധമായി പ്രവര്ത്തിച്ചാല് കര്ശനനടപടി സ്വീകരിക്കുമെന്നും എഡിജിപി റിപ്പോര്ട്ടില് വ്യക്തമാക്കിയിട്ടുണ്ട്. അമരവിള സ്വദേശി ആര് ജി ലെനിന്രാജ് ആണ് പരാതി നല്കിയത്.
