.jpg)
കുട്ടനാട്ടില് പാമ്പുകടിയേറ്റ് വീട്ടമ്മ മരിച്ചു
ആലപ്പുഴ മെഡിക്കല് കോളജ് ആശുപത്രിയില് എത്തിച്ച് ആന്റിവെനം നല്കിയെങ്കിലും ജീവന് രക്ഷിക്കാന് സാധിച്ചില്ല.
സംസ്ഥാനത്ത് വീണ്ടും പാമ്പുകടിയേറ്റ് മരണം. ആലപ്പുഴ കുട്ടനാട് വൈശ്യംഭാഗം പുതുവന വീട്ടില് രഘുവിന്റെ ഭാര്യ ഇന്ദിര (65) ആണ് മരിച്ചത്. വീടിനോടു ചേര്ന്നുള്ള ശുചിമുറിക്ക് മുന്നില് വെച്ചാണ് മൂര്ഖന് പാമ്പിന്റെ കടിയേറ്റത്. ഉടന് തന്നെ ആലപ്പുഴ മെഡിക്കല് കോളജ് ആശുപത്രിയില് എത്തിച്ച് ആന്റിവെനം നല്കിയെങ്കിലും ജീവന് രക്ഷിക്കാന് സാധിച്ചില്ല. തീവ്ര പരിചരണ വിഭാഗത്തില് ചികിത്സയിലിരിക്കെയാണ് മരണം സംഭവിച്ചത്.
സംസ്ഥാനത്ത് പാമ്പുകടി മരണം വര്ധിച്ചതോടെ ആരോഗ്യ വകുപ്പ് ജാഗ്രത നിര്ദേശങ്ങള് പുറപ്പെടുവിച്ചിട്ടുണ്ട്. പാമ്പുകടിയേറ്റവര്ക്ക് ആന്റിവെനം എത്രയു പെട്ടെന്ന് ലഭിക്കാന് നടപടി സ്വീകരിച്ചു. ആന്റിവെനം ലഭ്യമായ ആശുപത്രികളുടെ ലിസ്റ്റ് ആരോഗ്യവകുപ്പ് 108 ആംബുലന്സ് ടീമിന് കൈമാറി. പാമ്പുകടിയേറ്റാല് ഉടന് തന്നെ ആംബുലന്സില് വിളിച്ച് സഹായം തേടണമെന്നും അനാവശ്യമായി ചലനം ഒഴിവാക്കണമെന്നും ആരോഗ്യ വകുപ്പ് അറിയിച്ചു.
