'ആരോഗ്യം ആനന്ദം' പത്തനംതിട്ട ഫെസ്റ്റിന് ആവേശകരമായ തുടക്കം

Whatsapp Group

മേളയുടെ ആദ്യ ദിനത്തിൽ രാവിലെ 9 മണി മുതൽ കേരള ഫെഡറേഷൻ ഓഫ് ഗൈനക്കോളജിസ്റ്റിന്റെ നേതൃത്വത്തിൽ സ്തനാർബുദ പരിശോധനയും സെർവിക്കൽ ക്യാൻസർ സ്ക്രീനിംഗും ഉൾപ്പെടെയുള്ള വിപുലമായ മെഡിക്കൽ ക്യാമ്പ് നടന്നു. ലൈഫ് ലൈൻ ഹോസ്പിറ്റലിലെ ഡോ. ബി. പ്രസന്നകുമാരിയുടെ നേതൃത്വത്തിലാണ് ക്യാമ്പ് സംഘടിപ്പിച്ചത്. ഇതോടൊപ്പം മെഡിക്കൽ കോളേജിലെയും ആരോഗ്യ വകുപ്പിലെയും വിദഗ്ദ്ധ ഡോക്ടർമാർ നയിക്കുന്ന ജീവിതശൈലി രോഗ സങ്കീർണത നിർണയ ക്ലിനിക്കും നടക്കും. മൂന്ന് വർഷത്തിൽ കൂടുതൽ diabetes രോഗം ഉള്ളവർക്ക് കണ്ണിനെ ബാധിക്കുന്ന diabetic retinopathy എന്ന അസുഖം കണ്ടെത്താനുള്ള സ്ക്രീനിംഗ്,10 വർഷത്തിൽ കൂടുതൽ diabetes ഉള്ളവർക്ക് നാഡികളെ ബാധിക്കുന്ന diabetic ന്യൂറോപ്പതി കണ്ടെത്താനുള്ള പരിശോധന തുടങ്ങിയവും ഇതോടൊപ്പം നടക്കുന്നുണ്ട്.

വൈകുന്നേരം സിനിമാ താരം ഇർഷാദ് പങ്കെടുത്ത 'കവിതയും വർത്തമാനവും' എന്ന പരിപാടിയും തുടർന്ന് ആശാ ശരത് അവതരിപ്പിച്ച 'അപരാജിത' നൃത്തസന്ധ്യയും കാണികൾക്ക് മികച്ച അനുഭവമായി. മ്യൂസിക് റിയാലിറ്റി ഷോ താരം അവനിയും സംഘവും അവതരിപ്പിച്ച ഫ്യൂഷൻ സംഗീതവും അരങ്ങേറി. മേളയുടെ രണ്ടാം ദിനമായ ചൊവ്വാഴ്ച രാവിലെ മുതൽ സ്വസ്ഥി ഫൗണ്ടേഷന്റെ നേതൃത്വത്തിൽ ക്യാൻസർ സ്ക്രീനിംഗ് ക്യാമ്പും ജീവിതശൈലീ രോഗനിർണ്ണയ ക്ലിനിക്കും പ്രവർത്തിക്കും. കൂടാതെ വിവിധ ആരോഗ്യ വിഷയങ്ങളിൽ സെമിനാറുകളും സംഘടിപ്പിച്ചിട്ടുണ്ട്.

വൈകിട്ട് 3 മണിക്ക് ഇലന്തൂർ ഗവ. കോളേജ് കെട്ടിട ശിലാസ്ഥാപനം ഉന്നതവിദ്യാഭ്യാസ വകുപ്പ് മന്ത്രി ആർ. ബിന്ദു നിർവ്വഹിക്കും. തുടർന്ന് പത്തനംതിട്ട ആയുർവേദ ആശുപത്രിയുടെ നിർമ്മാണോദ്ഘാടനവും ക്യാൻസർ കെയർ പദ്ധതിയുടെ ഉദ്ഘാടനവും മന്ത്രി വീണാ ജോർജ് നിർവ്വഹിക്കും. രാത്രി 7 മണിക്ക് പിന്നണി ഗായിക അഞ്ജു ജോസഫ് നയിക്കുന്ന സംഗീത നിശയും ഉണ്ടാകും. നാല് ദിവസങ്ങളിലായി നടക്കുന്ന മേളയിൽ പങ്കെടുക്കുന്നവർക്ക് എല്ലാവിധ ആരോഗ്യ പരിശോധനകളും വിദഗ്ധ ഡോക്ടർമാരുടെ സേവനവും തികച്ചും സൗജന്യമായിരിക്കും.