ഗുരുവായൂര്‍ ക്ഷേത്രം: വന്‍ ഭക്തജനത്തിരക്ക്

തൃശൂര്‍: ഗുരുവായൂര്‍ ക്ഷേത്രത്തില്‍ വന്‍ ഭക്തജനത്തിരക്ക്. വൈശാഖത്തില്‍ മുഹൂര്‍ത്തമുള്ള ദിവസമായതാണ് തിരക്കേറാനിടയായത്. 181 വിവാഹങ്ങളുണ്ടായിരുന്നു. നാല് മണ്ഡപങ്ങളിലായി പുലര്‍ച്ചെ അഞ്ച് മുതല്‍ താലികെട്ട് ആരംഭിച്ചു. രാവിലെ എട്ടിനും പത്തിനും ഇടയിലുള്ള സമയത്താണ് കൂടുതല്‍ വിവാഹങ്ങളുണ്ടായത്.

ഈ സമയത്ത് നൂറോളം വിവാഹങ്ങളുണ്ടായി. ക്ഷേത്രപരിസരത്ത് പ്രത്യേക സംവിധാനങ്ങള്‍ ഒരുക്കിയതോടെ തിരക്ക് പ്രത്യക്ഷത്തില്‍ പ്രകടമായില്ല. നിരയില്‍ നില്‍ക്കാതെ ദര്‍ശനം നടത്തുന്നതിനായി 1959 പേരാണ് നെയ്‌വിളക്ക് ശീട്ടാക്കിയത്. ഈവകയില്‍ 1910590 രൂപ ദേവസ്വത്തിന് ലഭിച്ചു. 2086780 രൂപയുടെ തുലാഭാരം വഴിപാടുണ്ടായി. ക്ഷേത്രത്തിലേക്ക് വഴിപാടിനത്തില്‍ മാത്രമായി 6276287 രൂപയാണ് ഇന്നലെ മാത്രം ലഭിച്ചത്.