സംസ്ഥാനത്ത് കടുത്ത ചൂട് തുടരും, ഒറ്റപ്പെട്ടയിടങ്ങളിൽ വേനൽമഴയ്ക്കും സാധ്യത

തിരുവനന്തപുരം: സംസ്ഥാനത്ത് വരും ദിവസങ്ങളിലും കടുത്ത ചൂട് അനുഭവപ്പെടുമെന്ന് കേന്ദ്ര കാലാവസ്ഥാ വകുപ്പ്. ചൂട് തുടരുന്നതിനൊപ്പം വേനൽമഴയ്ക്കും സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചു. ഒറ്റപ്പെട്ടയിടങ്ങളിൽ വ്യാഴാഴ്ച വരെ ഇടിമിന്നലോട് കൂടിയ മഴയ്ക്കും 40 മുതൽ 50 കിലോമീറ്റർ വരെ വേ​ഗതയിൽ ശക്തമായ കാറ്റിനും സാധ്യതയുണ്ട്.

സംസ്ഥാനത്ത് ചൊവ്വാഴ്ച ഉയർന്ന താപനില പാലക്കാട് (39.4) രേഖപ്പെടുത്തി. പുനലൂരിൽ 38 ഡിഗ്രിയാണ് താപനില. വെള്ളിയാഴ്ച വരെ പാലക്കാട് ജില്ലയിൽ താപനില 40 ഡിഗ്രി വരെ ഉയർന്നേക്കും. കോട്ടയം ജില്ലയിൽ 38 °C വരെയും ആലപ്പുഴ, പത്തനംതിട്ട, എറണാകുളം, തൃശൂർ, മലപ്പുറം, കോഴിക്കോട്, കണ്ണൂർ, കാസർകോട് ജില്ലകളിൽ 37 °C വരെയും ഉയർന്ന താപനില രേഖപ്പെടുത്തുമെന്നാണ് പ്രവചനം. തിരുവനന്തപുരം ജില്ലയിൽ 36°C വരെയും ഉയരാൻ സാധ്യതയുണ്ട്. സാധരണയേക്കാൾ മൂന്ന് മുതൽ നാല് ഡി​ഗ്രി വരെ ചൂട് കൂടുതലുള്ളതിനാൽ ജാ​ഗ്രത പാലിക്കണമെന്നും നിർദേശമുണ്ട്.

വേനൽ മഴ ലഭിക്കുന്നതിനാൽ പീക്ക് സമയ വൈദ്യുതി ഉപഭോഗം 6000 മെഗാവാട്ടിൽ താഴെയായി. തിങ്കളാഴ്ച 5822 മെഗാവാട്ടായിരുന്നു ഉപഭോഗം. പ്രതിദിന ഉപഭോഗം 111.4243 ദശലക്ഷം യൂണിറ്റായിരുന്നു.