.jpg)
തെരഞ്ഞെടുപ്പ്; ഏപ്രില് 9 ന് ജീവനക്കാര്ക്കും തൊഴിലാളികള്ക്കും വേതനത്തോട് കൂടി അവധി അനുവദിച്ച് ലേബര് കമ്മീഷണറേറ്റ്
അവധിയുടെ അടിസ്ഥാനത്തില് ജീവനക്കാരുടേയോ തൊഴിലാളികളുടേയോ വേതനത്തില് കുറവു വരുത്തുകയോ വെട്ടിക്കുറയ്ക്കുയോ ചെയ്യാൻ പാടില്ലന്നും ഉത്തരവില് പറയുന്നു.
തിരുവനന്തപുരം: തെരഞ്ഞെടുപ്പ് ദിവസമായ ഏപ്രില് 9 ന് വേതനത്തോടെ അവധി നല്കുമെന്ന് ലേബർ കമ്മിഷണറേറ്റ്. വാർത്താക്കുറിപ്പിലാണ് സംസ്ഥാന ലേബർ കമ്മിഷണർ ഇക്കാര്യം അറിയിച്ചിരിക്കുന്നത്.
സംസ്ഥാനത്തെ മുഴുവൻ സ്വകാര്യ സ്ഥാപനങ്ങള്, സ്വകാര്യ വ്യവസായ കേന്ദ്രങ്ങള്, ഷോപ്സ് ആൻ്റ് കൊമേഷ്യല് എസ്റ്റാബ്ലിഷ്മെൻ്റ് ആക്ടിൻ്റെ പരിധിയില് വരുന്ന സ്വകാര്യ സ്ഥാപനങ്ങള് എന്നിവിടങ്ങളിലെ ജീവനക്കാർക്കും തൊഴിലാളികള്ക്കുമാണ് വോട്ടെടുപ്പു ദിവസമായ ഏപ്രില് 9 ന് വേതനത്തോടു കൂടിയ അവധി അനുവദിച്ചിരിക്കുന്നത്.
അവധിയുടെ അടിസ്ഥാനത്തില് ജീവനക്കാരുടേയോ തൊഴിലാളികളുടേയോ വേതനത്തില് കുറവു വരുത്തുകയോ വെട്ടിക്കുറയ്ക്കുയോ ചെയ്യാൻ പാടില്ലന്നും ഉത്തരവില് പറയുന്നു. സാധാരണ ഇത്തരത്തില് ഒരു അവധി ദിവസം വേതനം കിട്ടാത്ത വിധം ജോലി ചെയ്യുന്നവർക്ക് അവധി അനുവദിച്ചിട്ടില്ലെങ്കില് അവർക്ക് വേതനം നല്കേണ്ടതാണ്. എന്നാല് അവധി അനുവദിക്കുമ്പോള് ആ വ്യക്തി ചെയ്യുന്ന തൊഴിലിന് തുടർച്ചയായതോ ആപത്ക്കരമോ സാരവത്തായതോ ആയ നഷ്ടത്തിന് ഇടവരും എന്നുണ്ടെങ്കില് അയാള്ക്ക് വോട്ട് രേഖപ്പെടുത്തുന്നതിന് പ്രത്യേക അനുമതി നല്കണമെന്നും ഉത്തരവില് നിർദേശിക്കുന്നുണ്ട്.
ജോലി ചെയ്യുന്ന മണ്ഡലത്തില് അല്ലാതെ മറ്റൊരു മണ്ഡലത്തിലെ വോട്ടറായ, സ്വകാര്യ വ്യാവസായിക സ്ഥാപനങ്ങളിലോ മറ്റു സ്ഥാപനങ്ങളിലോ ജോലി ചെയ്യുന്ന ദിവസവേതന, കാഷ്വല്, കോണ്ട്രാക്ട് വ്യവസ്ഥയിലുള്ള തൊഴിലാളികള്ക്കും തെരഞ്ഞെടുപ്പു ദിവസം വേതനത്തോടു കൂടിയ അവധിയ്ക്ക് അർഹതയുണ്ട്. ഐ ടി, വ്യവസായ, പ്ലാൻ്റേഷൻ, നിർമാണ മേഖലകള് ഉള്പ്പെടെ എല്ലാ സ്വകാര്യ സ്ഥാപനങ്ങള്ക്കും ഈ ഉത്തരവ് ബാധകമായിരിക്കുമെന്നും ലേബർ കമ്മിഷണർ അറിയിച്ചു.