കാഞ്ഞിരപ്പള്ളിയിൽ ഏഴു വാഹനങ്ങൾ കൂട്ടിയിടിച്ച അപകടം ഡ്രൈവറുടെ ആത്മഹത്യാശ്രമം: പ്രതി അറസ്റ്റിൽ

കാഞ്ഞിരപ്പള്ളി: ദേശീയപാത 183-ൽ ചോറ്റി ജംഗ്ഷനിലുണ്ടായ ഏഴു വാഹനങ്ങൾ ഉൾപ്പെട്ട അതിദാരുണമായ വാഹനാപകടം കാർ ഡ്രൈവറുടെ ആത്മഹത്യാശ്രമമായിരുന്നുവെന്ന് പൊലീസ്. റോഡിൽ അമിതവേഗതയിൽ കാറോടിച്ച് മറ്റ് വാഹനങ്ങളിലേക്ക് മനഃപൂർവം ഇടിച്ചുകയറ്റുകയായിരുന്നുവെന്ന് സമ്മതിച്ചതിനെ തുടർന്ന് കൂട്ടിക്കൽ പുത്തൂർ സ്വദേശി ശാരോണിൺ ഫിലിപ്പിനെ (27) കാഞ്ഞിരപ്പള്ളി പൊലീസ് അറസ്റ്റ് ചെയ്തു. മനഃപൂർവമുള്ള നരഹത്യാശ്രമത്തിനാണ് ഇയാൾക്കെതിരെ കേസെടുത്തിരിക്കുന്നത്. ഞായറാഴ്ച രാവിലെ 8.15-ഓടെ മുണ്ടക്കയം ഭാഗത്തുനിന്നും അമിതവേഗതയിലെത്തിയ കാർ തുടരെ അഞ്ച് കാറുകളിലും ഓട്ടോറിക്ഷയിലും സ്കൂട്ടറിലുമിടിച്ചാണ് നിന്നത്. അപകടത്തിൽ പരിക്കേറ്റ ശാരോണിൺ നിലവിൽ പൊലീസ് കാവലിൽ കോട്ടയം മെഡിക്കൽ കോളജ് ആശുപത്രിയിൽ ചികിത്സയിലാണ്.

അപകടത്തിൽ കുട്ടികളടക്കം പത്തുപേർക്കാണ് പരിക്കേറ്റത്. നിയന്ത്രണം വിട്ട കാർ പാഞ്ഞുകയറിയതിനെ തുടർന്ന് കുടുംബം സഞ്ചരിച്ചിരുന്ന ഓട്ടോറിക്ഷ തലകീഴായി മറിയുകയും നാലുവയസ്സുകാരി ആവണിയടക്കമുള്ള യാത്രക്കാർക്ക് ഗുരുതരമായി പരിക്കേൽക്കുകയും ചെയ്തു. കൂട്ടിയിടിയുടെ ആഘാതത്തിൽ ഡോറുകൾ ലോക്കായി കാറിനുള്ളിൽ കുടുങ്ങിയ പ്രതിയെ നാട്ടുകാരും അഗ്നിരക്ഷാസേനയും ചേർന്നാണ് പുറത്തെടുത്തത്. പരിക്കേറ്റവരിൽ മൂന്നുപേർ പ്രാഥമിക ചികിത്സയ്ക്ക് ശേഷം ആശുപത്രി വിട്ടെങ്കിലും ബാക്കിയുള്ളവർ ചികിത്സയിൽ തുടരുകയാണ്. അപകടത്തെ തുടർന്ന് ദേശീയപാതയിൽ ഒരു മണിക്കൂറിലധികം ഗതാഗതം സ്തംഭിച്ചു. പ്രതിയെ കൂടുതൽ ചോദ്യം ചെയ്ത ശേഷം തുടർനടപടികൾ സ്വീകരിക്കുമെന്ന് പൊലീസ് അറിയിച്ചു.