.jpg)
ഗുരുവായൂര് ദേവസ്വം കണക്കുകളിലെ പൊരുത്തക്കേട്: ഹര്ജി ഇന്ന് പരിഗണിക്കും
വഴിപാടായി ലഭിച്ച സ്വര്ണം, വെള്ളി തുടങ്ങി വിലപിടിപ്പുള്ള പല വസ്തുക്കളും രജിസ്റ്ററില് കൃത്യമായി രേഖപ്പെടുത്തിയിട്ടില്ലെന്ന് നേരത്തെ ഓഡിറ്റ് വിഭാഗം ഹൈക്കോടതിയെ അറിച്ചിരുന്നു.
കൊച്ചി: ഗുരുവായൂര് ദേവസ്വം ബോര്ഡിലെ വാര്ഷിക കണക്കുകളിലെ പൊരുത്തക്കേടുമായി ബന്ധപ്പെട്ട ഹര്ജി ഹൈക്കോടതി ഇന്ന് പരിഗണിക്കും.ഗുരുവായൂര് ദേവസ്വത്തിന്റെ ഓഡിറ്റില് ഗുരുതര വീഴ്ചയെന്ന് ഹൈക്കോടതി കണ്ടെത്തിയിരുന്നു
ഓഡിറ്റിന്റെ തല്സ്ഥിതി അറിയിക്കാന് സംസ്ഥാന ഓഡിറ്റ് വിഭാഗം സീനിയര് ഡെപ്യൂട്ടി ഡയറക്ടര് കോടതിയില് ഹാജരാകും. ദേവസ്വത്തിലെ ഓണ്ലൈന് വഴിപാടുകളുടെയും ഡിജിറ്റല് പണമിടപാടുകളുടെയും കണക്കുകളില് ഗുരുതര ക്രമക്കേടുകള് ഉണ്ടെന്നാണ് ഹൈക്കോടതി ദേവസ്വം ബെഞ്ചിന്റെ നിരീക്ഷണം.
തുടര്ന്നാണ് ഓഡിറ്റ് വിഭാഗം ചുമതലയുള്ള ഉദ്യോഗസ്ഥന് നേരിട്ട് ഹാജരാകാന് ദേവസ്വം ബെഞ്ച് നിർദേശം നല്കിയത്.വഴിപാടായി ലഭിച്ച സ്വര്ണം, വെള്ളി തുടങ്ങി വിലപിടിപ്പുള്ള പല വസ്തുക്കളും രജിസ്റ്ററില് കൃത്യമായി രേഖപ്പെടുത്തിയിട്ടില്ലെന്ന് നേരത്തെ ഓഡിറ്റ് വിഭാഗം ഹൈക്കോടതിയെ അറിച്ചിരുന്നു.
ഡിജിറ്റല് പണമിടപാടുകളുടെ കൃത്യമായ അക്കൗണ്ടിങ് ഉറപ്പാക്കുന്ന സംവിധാനം നിലവിലില്ലെന്ന ഓഡിറ്റ് വിഭാഗം റിപ്പോര്ട്ടിന്റെ അടിസ്ഥാനത്തിലായിരുന്നു കോടതിയുടെ നിര്ദേശം. ദേവസ്വത്തിന്റെ സാമ്പത്തിക-ഭരണ സംവിധാനങ്ങള് പൂര്ണമായും ഡിജിറ്റലാക്കാന് വിദഗ്ധ സ്ഥാപനത്തെ നിയോഗിക്കണം എന്നാണ് ഹൈക്കോടതിയുടെ ഇടക്കാല ഉത്തരവ്. വരവ്-ചെലവ് കണക്കുകളുടെ ഓഡിറ്റ് റിപ്പോര്ട്ട് ഇന്ന് കോടതി വിശദമായി പരിശോധിക്കും.