.jpg)
മുഖ്യമന്ത്രിയുടെ പ്രവര്‍ത്തനശൈലിക്കെതിരെ പാര്‍ട്ടിക്കുള്ളില്‍നിന്ന് തന്നെ വിമര്‍ശനം; ഇടപെടാനൊരുങ്ങി ഹൈക്കമാന്‍ഡ്
തിരുവനന്തപുരം: മുഖ്യമന്ത്രി വിഡി സതീശന്റെ പ്രവര്‍ത്തനശൈലിക്കെതിരെ വിമര്ശനമുയർന്നതിന് പിന്നാലെ പരിഹാരത്തിനായി ഹൈക്കമാന്‍ഡ് ഒരുങ്ങുന്നു. പുതിയ സര്‍ക്കാരിന്റെ തുടക്കകാലത്ത് പിന്തുടര്‍ന്നിരുന്ന ഇടപെടലില്ലാത്ത നയം അവസാനിപ്പിച്ചാണ് കേന്ദ്ര നേതൃത്വം രംഗത്തെത്തുന്നത്. മുഖ്യമന്ത്രിക്കെതിരെ യുഡിഎഫ് കണ്‍വീനര്‍ അടൂര്‍ പ്രകാശ് പരസ്യവിമര്‍ശനം ഉന്നയിച്ചതിന് പിന്നാലെ, പാര്‍ട്ടിയിലെ അഭിപ്രായവ്യത്യാസങ്ങള്‍ പരിഹരിക്കാന്‍ കേന്ദ്ര നേതൃത്വം ഇടപെടുമെന്ന് എഐസിസി ജനറല്‍ സെക്രട്ടറി കെസി വേണുഗോപാല്‍ വ്യക്തമാക്കി.
'പാര്‍ട്ടിക്കുള്ളിലെ ആഭ്യന്തര വിഷയങ്ങള്‍ ചര്‍ച്ച ചെയ്യാനും പരിഹരിക്കാനും കൃത്യമായ സംവിധാനമുണ്ട്. അഭിപ്രായവ്യത്യാസങ്ങള്‍ ചര്‍ച്ചകളിലൂടെ പരിഹരിക്കും. ഇതിനായി പാര്‍ട്ടി നേതൃത്വം തന്നെ മുന്‍കൈയെടുക്കും' -കെസി വേണുഗോപാല്‍ മാധ്യമങ്ങളോട് പറഞ്ഞു.അടൂര്‍ പ്രകാശ് രംഗത്തുവന്നത് തന്റെ പ്രേരണയാലാണെന്ന മാധ്യമവാര്‍ത്തകളില്‍ കെസി വേണുഗോപാല്‍ അസംതൃപ്തി പ്രകടിപ്പിച്ചു. വിഷയം പരസ്യമാക്കിയ യുഡിഎഫ് കണ്‍വീനറുടെ നടപടിയെ തള്ളിക്കളഞ്ഞ അദ്ദേഹം, വിവാദങ്ങളില്‍ നിന്ന് അകലം പാലിക്കാനും ശ്രമിച്ചു. എല്ലാ പ്രശ്‌നങ്ങളിലും തന്നെ കുറ്റക്കാരനാക്കാനാണ് ചിലര്‍ ശ്രമിക്കുന്നത്. സര്‍ക്കാരിനെതിരെ താന്‍ ഒരു പരാമര്‍ശവും നടത്തിയിട്ടില്ല. മറ്റൊരാളുടെ വ്യക്തിപരമായ അഭിപ്രായങ്ങളിലേക്ക് തന്നെ എന്തിനാണ് വലിച്ചിഴക്കുന്നതെന്നും അദ്ദേഹം ചോദിച്ചു.
മറ്റു നേതാക്കളോ മുന്നണിയിലെ ഘടകകക്ഷികളോ പിന്തുണച്ചില്ലെങ്കിലും താന്‍ പറഞ്ഞ നിലപാടില്‍ അടൂര്‍ പ്രകാശ് ഉറച്ചുനില്‍ക്കുകയാണ്. പരസ്യമായ പിന്തുണ ഉണ്ടായിട്ടില്ലെങ്കിലും, തന്റെ വികാരങ്ങള്‍ പങ്കുവെക്കുന്ന പാര്‍ട്ടിയിലെയും ഘടകകക്ഷികളിലെയും പല നേതാക്കളും ഫോണില്‍ വിളിച്ച് ഐക്യദാര്‍ഢ്യം അറിയിച്ചിട്ടുണ്ടെന്നും അദ്ദേഹം പറഞ്ഞു. വിഷയം നേരിട്ട് എഐസിസിയെ അറിയിക്കാതെ വാര്‍ത്താസമ്മേളനം നടത്തിയത് എന്തുകൊണ്ടാണെന്ന ചോദ്യത്തിന്, അതിന് കൃത്യമായ കാരണമുണ്ടെന്നും വെളിപ്പെടുത്താനുള്ള സമയം ആയിട്ടില്ലെന്നുമായിരുന്നു അദ്ദേഹത്തിന്റെ പ്രതികരണം.