.jpg)
'പ്രിയദര്ശിനി' സൗജന്യ ബസ് യാത്ര പദ്ധതി മുഖ്യമന്ത്രി ഉദ്ഘാടനം ചെയ്യും
വനിതകള്ക്കൊപ്പം മുഖ്യമന്ത്രിയും മന്ത്രിമാരും ആദ്യ യാത്ര നടത്തും.
കെഎസ്ആര്ടിസി ഓര്ഡിനറി ബസുകളില് സ്ത്രീകള്ക്കും ട്രാന്സ്ജെന്ഡേഴ്സിനുമുള്ള സൗജന്യ യാത്ര ഇന്ന് മുതല്. രാവിലെ എട്ടരയ്ക്ക് തിരുവനന്തപുരം തമ്പാനൂര് കെഎസ്ആര്ടിസി കോംപ്ലക്സില് മുഖ്യമന്ത്രി വി ഡി സതീശന് പ്രിയദര്ശിനി പദ്ധതി ഉദ്ഘാടനം ചെയ്യും. തുടര്ന്ന് വനിതകള്ക്കൊപ്പം മുഖ്യമന്ത്രിയും മന്ത്രിമാരും ആദ്യ യാത്ര നടത്തും. കെഎസ്ആര്ടിസിയില് പിഎസ്സി വഴി നിയമിച്ച ആദ്യ വനിതാ ഡ്രൈവറായ വി പി ഷീലയാണ് ഉദ്ഘാടന ബസ് യാത്രയുടെ ഡ്രൈവര്. അതേസമയം 'പ്രിയദര്ശിനി' പദ്ധതിയുടെ ഉദ്ഘാടന പരിപാടിയില് സിപിഎം പങ്കെടുക്കില്ല. പരിപാടിയില് നിന്ന് വിട്ടുനില്ക്കാന് മുഴുവന് എംഎല്എമാര്ക്കും സിപിഎം നിര്ദേശം നല്കി.
പ്രിയദര്ശിനി സൗജന്യ യാത്രാ പദ്ധതിയുടെ ഉദ്ഘാടത്തിന് ശേഷം രാവിലെ ഒമ്പത് മണി മുതല് സ്ത്രീകള്ക്കും ട്രാന്സ്ജെന്ഡേഴ്സിനും ഓര്ഡിനറി ബസുകളില് സീറോ ടിക്കറ്റ് ലഭ്യമായി തുടങ്ങും. സ്തീകള്ക്ക് സൗജന്യമുള്ള ഓര്ഡിനറി ബസുകള് തിരിച്ചറിയാനായി ബസുകളില് 'പ്രിയദര്ശിനി' സ്റ്റിക്കര് പതിച്ചിട്ടുണ്ട്. വരുമാനമോ പ്രായമോ പരിഗണിക്കാതെയും പ്രത്യേക നിബന്ധനകളില്ലാതെയുമാണ് ആദ്യഘട്ടത്തില് ഓര്ഡിനറി ബസുകളില് സൗജന്യ യാത്രാ സൗകര്യം ലഭ്യമാക്കുന്നത്.
