.jpg)
വിവാദ പരാമര്ശം: ടി ജി മോഹന്ദാസിന്റെ വീട്ടിലേക്ക് പ്രതിഷേധിച്ച എഐവൈഎഫ് പ്രവര്ത്തകര്ക്കെതിരെ കേസ്
നിയമവിരുദ്ധമായി സംഘം ചേരല് അടക്കമുള്ള വകുപ്പുകളിലാണ് മട്ടാഞ്ചേരി പൊലീസ് കേസെടുത്തത്.
ദില്ലി ജന്തര് മന്തറില് പ്രതിഷേധിച്ച വിദ്യാര്ത്ഥികളെ വെടിവെച്ച് കൊല്ലണമെന്ന പ്രസ്താവന നടത്തിയ ടി ജി മോഹന്ദാസിന്റെ വീട്ടിലേക്ക് പ്രതിഷേധിച്ചവര്ക്കെതിരെ കേസെടുത്ത് പൊലീസ്. എഐവൈഎഫ് പ്രവര്ത്തകര്ക്കെതിരെയാണ് പൊലീസ് കേസെടുത്തത്. നിയമവിരുദ്ധമായി സംഘം ചേരല് അടക്കമുള്ള വകുപ്പുകളിലാണ് മട്ടാഞ്ചേരി പൊലീസ് കേസെടുത്തത്.
വിവാദ പരാമര്ശനങ്ങള് നടത്തിയതിന് ടി ജി മോഹന്ദാസിനെതിരെ ഇന്നലെ കേസെടുത്തിരുന്നു. തിരുവനന്തപുരം സൈബര് പൊലീസാണ് കലാപാഹ്വാനത്തിന് കേസെടുത്തത്. അശ്ലീലവും അധിക്ഷേപവും നിറച്ച വീഡിയോകള്ക്കെതിരെ വ്യാപക പ്രതിഷേധമുയര്ന്നു. ആദ്യം പരാതി നല്കിയത് എഐവൈഎഫ് സംസ്ഥാന സെക്രട്ടറി ടിടി ജിസ്മോനാണ്. പിന്നാലെ പരാതിയുടെ പ്രളയമായിരുന്നു. സൈബല് സെല് ഓപ്പേറഷന്സ് ഐജിയെ അന്വേഷണത്തിന് ചുമതലപ്പെടുത്തിയെങ്കിലും കേസെടുക്കാന് എടുത്ത കാലതാമസം ചര്ച്ചയായി. കേസെടുക്കാന് വൈകിയതില് ഡെപ്യൂട്ടി സ്പീക്കര് ഉള്പ്പെടെ അതൃപ്തി പരസ്യമാക്കിയിരുന്നു. ഒടുവില് പരാതികളെത്തി മൂന്നാം ദിവസമാണ് മോഹന്ദാസിനെതിരെ കേസെടുത്തത്.
കലാപാഹ്വാനത്തിനും പൊതുമധ്യത്തില് അധിക്ഷേപിച്ചതിനുമാണ് തിരുവനന്തപുരം സിറ്റി സൈബര് ക്രൈം പൊലീസിന്റെ കേസ്. ലഹള ഉണ്ടാക്കണമെന്ന ഉദ്ദേശത്തോടെ യൂട്യൂബ് ചാനല് വഴി വീഡിയോകള് പ്രചരിപ്പിച്ചെന്ന് എഫ്ഐആര്. കേസെടുക്കാന് വൈകരുതെന്ന് കോണ്ഗ്രസിനുളളില് നിന്ന് തന്നെ അഭിപ്രായമുയര്ന്നതിന് പിന്നാലെയാണ് നടപടി.