.jpg)
സാമ്പത്തിക തട്ടിപ്പ് കേസില്‍ ബിഎല്‍എം സ്ഥാപക ചെയര്‍മാന്‍ ആര്‍ പ്രേംകുമാറിനെ വീണ്ടും അറസ്റ്റ് ചെയ്യാന്‍ നീക്കം
കോഴിക്കോട് ജുഡീഷ്യല്‍ മജിസ്‌ട്രേറ്റ് കോടതിയിലാണ് ഹര്‍ജി നല്‍കുന്നത്.
സാമ്പത്തിക തട്ടിപ്പ് കേസില്‍ ബിഎല്‍എം സ്ഥാപക ചെയര്‍മാന്‍ ആര്‍ പ്രേംകുമാറിനെ വീണ്ടും അറസ്റ്റ് ചെയ്യാന്‍ നീക്കം. ഇതിനായി ക്രൈം ബ്രാഞ്ച് ഉടന്‍ കോടതിയില്‍ ഹര്‍ജി നല്‍കും. കോഴിക്കോട് ജുഡീഷ്യല്‍ മജിസ്‌ട്രേറ്റ് കോടതിയിലാണ് ഹര്‍ജി നല്‍കുന്നത്. നടപടിക്രമങ്ങള്‍ പാലിക്കാതെയാണ് അറസ്റ്റ് ചെയ്തതതെന്ന പ്രതിഭാഗത്തിന്റെ വാദം അംഗീകരിച്ചാണ് കോടതി ഇന്നലെ ആര്‍ പ്രേംകുമാറിനെ വിട്ടയിച്ചത്.
തട്ടിപ്പിന്റെ വ്യാപ്തിയും കസ്റ്റഡി ആവശ്യവും വ്യക്തമാക്കി വീണ്ടും കോടതിയെ സമീപിക്കാനാണ് പ്രോസിക്യൂഷന്‍ നീക്കം. 300 കോടിയുടെ തട്ടിപ്പ് നടന്നിട്ടുണ്ടെന്നാണ് ക്രൈം ബ്രാഞ്ചിന്റെ പ്രാഥമിക കണ്ടെത്തല്‍.
അതേ സമയം ഇടുക്കി സ്വദേശിയുടെ പരാതിയില്‍ കോതമംഗലം പോലീസ് രജിസ്റ്റര്‍ ചെയ്ത പുതിയ കേസിലും പ്രേംകുമാറിനെ അറസ്റ്റ് ചെയ്യാന്‍ സാധ്യത ഉണ്ട്. ബിഎല്‍എമ്മിലെ മുന്‍ ജീവനക്കാരി സോണിയ നല്‍കിയ പരാതിയിലാണ് കേസ് എടുത്തത്. ചെയര്‍മാനാണെന്ന് തെറ്റിദ്ധരിപ്പിച്ച് ഒരു കോടി 60 ലക്ഷം രൂപ തട്ടിയെടുത്തെന്നാണ് കേസ്. സൊസൈറ്റിയില്‍ നിന്നും പണം തട്ടിയതിന് നേരത്തെ പുറത്താക്കിയ ആളാണ് പുതിയ പരാതിക്ക് പിന്നിലെന്നും, സോണിയക്കെതിരെ കേസ് ഉണ്ടെന്നുമാണ് ബിഎല്‍എമ്മിന്റെ വിശദീകരണം. നിലവില്‍ ചെയര്‍മാനല്ലാത്ത പ്രേംകുമാറിനെ ചെയര്‍മാന്‍ എന്നരീതിയില്‍അവതരിപ്പിക്കുന്നതിനെതിരേയും പരാതിയുണ്ട്
