.jpg)
സ്ത്രീയെ ആക്രമിച്ച് മാല കവരാന്‍ ശ്രമിച്ച മാപ്രാണം സ്വദേശികളായ പ്രതികള്‍ അറസ്റ്റില്‍
തൃശൂര്‍: ജോലി കഴിഞ്ഞ് വീട്ടിലേക്ക് മടങ്ങുകയായിരുന്ന സ്ത്രീയെ ആക്രമിച്ച് മാല കവരാന്‍ ശ്രമിച്ച പ്രതികള്‍ അറസ്റ്റില്‍. കരുവന്നൂര്‍ തേലപ്പിള്ളി വെണ്ടാശേരി വീട്ടില്‍ വിഷ്ണു (24), മാപ്രാണം അച്ചുനായര്‍ മൂലയില്‍ ആനന്ദപുരത്ത് വീട്ടില്‍ ആകാശ് (25) എന്നിവരെയാണ് സി.ഐ. അനീഷ് കരീം, എസ്.ഐ. എം.എസ് ഷാജന്‍ എന്നിവരുടെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്.
ഇരിങ്ങാലക്കുട മണ്ണാത്തിക്കുളം റോഡില്‍വച്ച് ഈ മാസം രണ്ടിനായിരുന്നു സംഭവം. ബൈക്കിലെത്തിയ പ്രതികള്‍ മാല കവര്‍ന്നുവെങ്കിലും സ്ത്രീ പ്രതിരോധം തീര്‍ത്തതോടെ മാല ഉപേക്ഷിച്ച് പ്രതികള്‍ രക്ഷപ്പെടുകയായിരുന്നു. സി.സി.ടിവി കാമറകളുടെയും മറ്റും സഹായത്തോടെ പോലീസ് നടത്തിയ അന്വേഷണമാണ് പ്രതികളെ കുടുക്കിയത്. വിവാഹത്തിന് ശേഷം പ്രതികളില്‍ ഒരാള്‍ക്ക് നേരിട്ട സാമ്പത്തിക ബാധ്യതയാണ് സംഭവത്തിന് കാരണമായതെന്ന് പ്രതികള്‍ പോലീസിനോട് വെളിപ്പെടുത്തി.കോടതിയില്‍ ഹാജരാക്കിയ പ്രതികളെ റിമാന്റ് ചെയ്തു. പോലീസ് ഉദ്യോഗസ്ഥരായ എന്‍.കെ. അനില്‍കുമാര്‍, ജലീല്‍, ഉല്ലാസ് പൂതോട്ട്, രാഹുല്‍, വിപിന്‍ എന്നിവരും അന്വേഷണസംഘത്തില്‍ ഉണ്ടായിരുന്നു.
