.jpg)
അര്ജുന് ആയങ്കി ആഭ്യന്തരമന്ത്രിയെ വെല്ലുവിളിച്ച് പോസ്റ്റ് ചെയ്ത ഫോണ് അഭിഭാഷകയുടെ വീട്ടിലെ ഷൂ റാക്കില് കണ്ടെത്തി
പ്രത്യേക അന്വേഷണ സംഘവും സിറ്റി സൈബര് പോലീസും ചേര്ന്ന് നടത്തിയ പരിശോധനയിലാണ് ഫോണ് പിടിച്ചെടുത്തത്.
ആഭ്യന്തരമന്ത്രി രമേശ് ചെന്നിത്തലയെയും പോലീസിനെയും സമൂഹമാധ്യമങ്ങളിലൂടെ വെല്ലുവിളിക്കുകയും അധിക്ഷേപിക്കുകയും ചെയ്ത കേസില് റിമാന്ഡിലുള്ള അര്ജുന് ആയങ്കിയുടെ (28) മൊബൈല് ഫോണ് പോലീസ് കണ്ടെടുത്തു. അഭിഭാഷക ഡലീറ്റ ടൈറ്റസിന്റെ വീട്ടുപരിസരത്തെ കോണിപ്പടിക്ക് താഴെയുള്ള ഷൂറാക്കില് നിന്ന് സ്വിച്ച് ഓഫ് ചെയ്ത നിലയിലാണ് ഫോണ് കണ്ടെത്തിയത്. പ്രത്യേക അന്വേഷണ സംഘവും സിറ്റി സൈബര് പോലീസും ചേര്ന്ന് നടത്തിയ പരിശോധനയിലാണ് ഫോണ് പിടിച്ചെടുത്തത്.
വിവാദപരമായ സമൂഹമാധ്യമ പോസ്റ്റുകള് ഇട്ടത് ഈ ഫോണില് നിന്നാണെന്ന് അര്ജുന് ആയങ്കി അന്വേഷണസംഘത്തോട് സമ്മതിച്ചു. പോലീസ് എത്താന് സാധ്യതയുണ്ടെന്ന് മനസിലാക്കി ഫോണ് സ്വിച്ച് ഓഫ് ചെയ്ത് ഷൂറാക്കില് ഒളിപ്പിക്കുകയായിരുന്നുവെന്നാണ് മൊഴി. തലശ്ശേരി സബ് ജയിലില് റിമാന്ഡിലായിരുന്ന അര്ജുനെ ചോദ്യം ചെയ്യലിനും തെളിവെടുപ്പിനുമായി കോടതി സൈബര് പോലീസിന്റെ കസ്റ്റഡിയില് വിട്ടിരുന്നു.
അര്ജുന് ഒളിവില് കഴിഞ്ഞ മട്ടന്നൂര് മരുതായി, തോട്ടട, ചാലോട് എന്നിവിടങ്ങളില് പോലീസെത്തി തെളിവെടുപ്പ് നടത്തി. സുഹൃത്തുക്കളായ ജിതിന്, പ്രണവ് എന്നിവര്ക്കൊപ്പമാണ് അര്ജുന് മരുതായിലെ വീട്ടിലെത്തിയത്. തളിപ്പറമ്പ് പട്ടുവത്തിനടുത്തുള്ള കെട്ടിടത്തിലും അര്ജുന് തങ്ങിയിരുന്നതായി വിവരം ലഭിച്ചിട്ടുണ്ട്. ഇവിടങ്ങളില് തുടര് തെളിവെടുപ്പ് നടക്കും. കസ്റ്റഡി കാലാവധി പൂര്ത്തിയാകുന്നതോടെ നാളെ പ്രതിയെ വീണ്ടും കോടതിയില് ഹാജരാക്കും.