.jpg)
വരുന്നവരെ ഗുഡ് മോര്ണിങ് പറഞ്ഞ് സ്വീകരിക്കും, പൊലീസ് സ്റ്റേഷനുകൾ അടിമുടി മാറും
തിരുവനന്തപുരം: കേരളത്തിലെ മുഴുവന് പൊലീസ് സ്റ്റേഷനുകള്ക്കും പുതിയ മുഖം നല്കാനും മയക്ക് മരുന്ന് വിപണനം കാര്യക്ഷമമായി തടയാന് ലക്ഷ്യമിട്ടും നടപടി സ്വീകരിച്ചതായി ആഭ്യന്തര മന്ത്രി രമേശ് ചെന്നിത്തല. കേരളത്തിലെ 484 പൊലീസ് സ്റ്റേഷനുകളിലും മാറ്റം കൊണ്ടുവരും. സ്റ്റേഷനുകളില് ആര് കടന്നുവന്നാല് ആദ്യം ഗുഡ്മോണിങ് പറയും. നമസ്കാരം പറയും. അവരെ സ്വീകരിച്ച് ഇരുത്തി അവരുടെ പരാതികള് കേള്ക്കുന്നതിനുള്ള സംവിധാനം ഒരുക്കുമെന്നും രമേശ് ചെന്നിത്തല പറഞ്ഞു. ഉന്നത പൊലീസ് ഉദ്യോഗസ്ഥരുമായുള്ള യോഗത്തിന് ശേഷം മാധ്യമങ്ങളെ കാണുകയായിരുന്നു രമേശ് ചെന്നിത്തല.
പൊലീസ് സ്റ്റേഷനുകള് വൃത്തിയായി സൂക്ഷിക്കും. സ്റ്റേഷനുകളില് വര്ഷങ്ങളായി കെട്ടിക്കിടക്കുന്ന വാഹനങ്ങള് നീക്കം ചെയ്യും. ഇതിന് പൊലീസ് ആക്ട് അനുസരിച്ച് നടപടി സ്വീകരിക്കും. പൊലീസ് സ്റ്റേഷനുകള്ക്ക് പുതിയ മുഖം നല്കും. ഉദ്യോഗസ്ഥരുടെ പ്രവര്ത്തനങ്ങളില് മാറ്റം ഉണ്ടാവും. സ്റ്റേഷനുകളില് വരുന്നവരെ കുറ്റവാളിയായി കാണാതെ അവര് പറയുന്നത് സമചിത്തതയോടെ കേള്ക്കാനും അത് പരിഹരിക്കാനും പൊലീസ് ഉദ്യോഗസ്ഥര്ക്ക് ഉത്തരവാദിത്തമുണ്ട്. പൊലീസ് സ്റ്റേഷന് ജനസേവ കേന്ദ്രങ്ങളാക്കി മാറ്റാന് ലക്ഷ്യമിട്ടാണ് നടപടിയെന്നും മന്ത്രി പറഞ്ഞു.
