മഴവെള്ള സംഭരണത്തെക്കുറിച്ച് ബോധവൽക്കരണ പരിപാടി സംഘടിപ്പിച്ച് അമൃത സർവകലാശാല വിദ്യാർത്ഥികൾ

 കിണത്തുക്കടവ് (കോയമ്പത്തൂർ): റൂറൽ അഗ്രികൾച്ചറൽ വർക്ക് എക്സ്പീരിയൻസ് (RAWE) പദ്ധതിയുടെ ഭാഗമായി അമൃത വിശ്വവിദ്യാപീഠത്തിലെ അമൃത കോളേജ് ഓഫ് അഗ്രികൾച്ചറൽ സയൻസസിലെ അവസാന വർഷ വിദ്യാർത്ഥികൾ കിണത്തുക്കടവ് സൊക്കനൂർ പഞ്ചായത്തിൽ മഴവെള്ള സംഭരണത്തെക്കുറിച്ച് ബോധവൽക്കരണ പരിപാടി സംഘടിപ്പിച്ചു. ജലസംരക്ഷണത്തിന്റെ പ്രാധാന്യത്തെക്കുറിച്ചും മഴവെള്ളത്തിന്റെ സുസ്ഥിര പരിപാലനത്തെക്കുറിച്ചും കർഷകർക്കിടയിൽ അവബോധം സൃഷ്ടിക്കുകയായിരുന്നു പരിപാടിയുടെ പ്രധാന ലക്ഷ്യം.

കോളേജ് ഡീൻ ഡോ. സുധീഷ് മണാലിലിന്റെ മാർഗനിർദേശത്തിലാണ് പരിപാടി സംഘടിപ്പിച്ചത്. വിദ്യാർത്ഥികളായ അഭിശ്രേയ , വൈഷ്ണവി , അഞ്ജന, അനഘ , നിരഞ്ജന , നീരജ , അമൃത, ദിയ ,  മണികണ്ഠൻ, ശ്രീദത്ത് , ആഷിഷ് എന്നിവർ നേതൃത്വം നൽകി. ജലസ്രോതസ്സുകളുടെ സംരക്ഷണം, ഭൂഗർഭജല പരിപോഷണം, ജലക്ഷാമ പരിഹാരം എന്നിവയിൽ മഴവെള്ള സംഭരണത്തിനുള്ള പ്രാധാന്യം വിദ്യാർത്ഥികൾ വിശദീകരിച്ചു. വിവിധ മഴവെള്ള സംഭരണ രീതികളെക്കുറിച്ചും സുസ്ഥിര കൃഷിയിൽ അവയ്ക്കുള്ള പങ്കിനെക്കുറിച്ചും ബോധവൽക്കരണം നടത്തി. ജലനഷ്ടം കുറയ്ക്കാനും ജലം ഫലപ്രദമായി വിനിയോഗിക്കാനും സംഭരിച്ച മഴവെള്ളം തുള്ളിനന (ഡ്രിപ്പ്), സ്പ്രിങ്ക്ലർ തുടങ്ങിയ സൂക്ഷ്മ ജലസേചന സംവിധാനങ്ങളുമായി സംയോജിപ്പിക്കേണ്ടതിന്റെ ആവശ്യകതയും ഊന്നിപ്പറഞ്ഞു.

കർഷകരുടെ നിലവിലുള്ള കൃഷിരീതികളും ജലവുമായി ബന്ധപ്പെട്ട പ്രശ്നങ്ങളും മനസ്സിലാക്കുന്നതിനായി കർഷകരുമായി സംവാദവും നടന്നു. ഭൂഗർഭജലനിരപ്പ് താഴുന്നത്, വേനൽക്കാലത്തെ ജലക്ഷാമം, മഴവെള്ളം കെട്ടിക്കിടക്കുന്നത്, ജലസേചന രീതികൾ, ജലസംരക്ഷണത്തിനുള്ള സർക്കാർ സബ്സിഡികളെക്കുറിച്ചുള്ള അറിവ് തുടങ്ങിയ വിഷയങ്ങൾ ചർച്ചയായി.

ഓരോ കൃഷിയിടത്തിന്റെയും സാഹചര്യത്തിനും ജലാവശ്യത്തിനും അനുയോജ്യമായ മഴവെള്ള സംഭരണ സംവിധാനങ്ങളും കാര്യക്ഷമമായ ജലസേചന രീതികളും സ്വീകരിക്കാൻ വിദ്യാർത്ഥികൾ കർഷകരെ പ്രോത്സാഹിപ്പിച്ചു. സുസ്ഥിര കൃഷിക്ക് ജലവിഭവങ്ങളുടെ സംരക്ഷണവും ശാസ്ത്രീയ വിനിയോഗവും അനിവാര്യമാണെന്നും, അതിൽ കർഷകർക്കും ഗ്രാമസമൂഹത്തിനും കൂട്ടായ ഉത്തരവാദിത്തമുണ്ടെന്നും ഓർമ്മിപ്പിച്ചുകൊണ്ടാണ് പരിപാടി സമാപിച്ചത്.