‘പുതിയ മുഖ്യമന്ത്രിയിൽ നിന്ന് തുടക്കത്തിൽ തന്നെ ജനപ്രിയ പ്രഖ്യാപനങ്ങൾ പ്രതീക്ഷിക്കരുത്’ ; എ.കെ. ആന്റണി

 കേരളത്തിന്റെ പുതിയ മുഖ്യമന്ത്രിയായി വി.ഡി. സതീശനെ തിരഞ്ഞെടുത്ത ഹൈക്കമാൻഡ് തീരുമാനത്തിൽ അതീവ സന്തോഷവും പൂർണ്ണ പിന്തുണയും രേഖപ്പെടുത്തി മുതിർന്ന കോൺഗ്രസ് നേതാവ് എ.കെ. ആന്റണി. ഹൈക്കമാൻഡിന്റെ ഈ നിർണ്ണായക തീരുമാനത്തെ താൻ പൂർണ്ണ മനസ്സോടെ സ്വാഗതം ചെയ്യുന്നുവെന്ന് അദ്ദേഹം വ്യക്തമാക്കി. അധികാരത്തിലേറുന്നവരെ ആർപ്പുവിളിക്കുകയും പിന്നീട് അതേ വ്യക്തികൾക്കെതിരെ തന്നെ കല്ലെറിയുകയും ചെയ്യുന്ന രാഷ്ട്രീയ പ്രവണത കേരളത്തിൽ ആവർത്തിക്കരുതെന്നും ആന്റണി മുന്നറിയിപ്പ് നൽകി.

സംസ്ഥാനത്തിന്റെ നിലവിലെ സാമ്പത്തിക സ്ഥിതി അതീവ ഗുരുതരമാണെന്നും, ഖജനാവ് കാലിയായ അവസ്ഥയിലൂടെയാണ് കേരളം കടന്നുപോകുന്നതെന്നും ആന്റണി ചൂണ്ടിക്കാട്ടി. അതിനാൽ, പുതിയ മുഖ്യമന്ത്രിയിൽ നിന്ന് തുടക്കത്തിൽ തന്നെ ജനപ്രിയ പ്രഖ്യാപനങ്ങൾ പ്രതീക്ഷിക്കരുതെന്ന് അദ്ദേഹം ജനങ്ങളോട് അഭ്യർത്ഥിച്ചു. സംസ്ഥാനത്തെ സാമ്പത്തിക പ്രതിസന്ധിയിൽ നിന്ന് കരകയറ്റാൻ പുതിയ സർക്കാരിന് ആവശ്യമായ സാവകാശം നൽകണമെന്നും, കയ്പേറിയ തീരുമാനങ്ങൾ എടുക്കാൻ സതീശന് നിർബന്ധിതനാകേണ്ടി വരുമെന്നും അദ്ദേഹം ഓർമ്മിപ്പിച്ചു. 2001-ൽ താൻ മുഖ്യമന്ത്രിയായിരുന്നപ്പോൾ ലഭിച്ച മാധ്യമപിന്തുണയും ജനപ്രീതിയും കാലക്രമേണ നഷ്ടപ്പെട്ട സാഹചര്യവും അദ്ദേഹം അനുസ്മരിച്ചു.

ഡൽഹിയിൽ നടന്ന ഹൈക്കമാൻഡ് ചർച്ചകൾക്ക് ശേഷമാണ് വി.ഡി. സതീശന്റെ പേര് ഔദ്യോഗികമായി പ്രഖ്യാപിക്കപ്പെട്ടത്. എ.ഐ.സി.സി നിരീക്ഷകരായ മുകുൾ വാസ്‌നിക്, അജയ് മാക്കൻ, ദീപാദാസ് മുൻഷി എന്നിവരാണ് മുഖ്യമന്ത്രിയെ പ്രഖ്യാപിച്ചത്. കെ.സി. വേണുഗോപാലിന്റെ പേര് അവസാന നിമിഷം വരെ ചർച്ചകളിൽ സജീവമായിരുന്നുവെങ്കിലും, രാഹുൽ ഗാന്ധിയുടെ ഇടപെടലും മുതിർന്ന നേതാക്കളുടെ അഭിപ്രായങ്ങളും പൊതുവികാരവും കണക്കിലെടുത്ത് ഹൈക്കമാൻഡ് സതീശനെ തന്നെ തിരഞ്ഞെടുക്കുകയായിരുന്നു. മുസ്ലീം ലീഗ് ഉൾപ്പെടെയുള്ള ഘടകകക്ഷികളുടെ ഉറച്ച പിന്തുണയും സതീശന് അനുകൂലമായ ഘടകമായി മാറി.