.jpg)
നടിയെ ആക്രമിച്ച കേസ്:മെമ്മറി കാർഡ് ഹാഷ് വാല്യുവിലെ അതിജീവിതയുടെ ഹർജിയിൽ രണ്ടാമത്തെ ഹൈക്കോടതി ജഡ്ജിയും പിന്മാറി
അതിജീവിതയുടെ ഹര്ജി മറ്റൊരു ബെഞ്ച് പരിഗണിക്കും
കൊച്ചി: നടിയെ ആക്രമിച്ച കേസിന്റെ അന്വേഷണത്തിനിടെ മെമ്മറി കാര്ഡിലെ ദൃശ്യങ്ങള് ചോര്ന്നതില് അന്വേഷണം വേണമെന്നാവശ്യപ്പെട്ട് അതിജീവിത നല്കിയ ഹര്ജിയി പരിഗണിക്കുന്നതില് നിന്നും രണ്ടാമത്തെ ഹൈക്കോടതി ജഡ്ജിയും പിന്മാറി.ജസ്റ്റിസ് കൗസര് എടപ്പഗത്താണ് പിന്മാറിയത്. നേരത്തെ ജസ്റ്റിസ് ജോബിന് സെബാസ്റ്റ്യനാണ് ഹര്ജി പരിഗണിക്കുന്നതില് നിന്ന് പിന്മാറിയത്. മെമ്മറി കാര്ഡിലെ ദൃശ്യങ്ങള് ചോര്ന്നതില് പുനരന്വേഷണം ആവശ്യപ്പെട്ട് കഴിഞ്ഞ ദിവസമായിരുന്നു അതിജീവിത ഹൈക്കോടതിയില് ഹര്ജി നല്കിയത്.
അതിജീവിതയുടെ ഹര്ജി മറ്റൊരു ബെഞ്ച് പരിഗണിക്കും. മെമ്മറി കാര്ഡ് നിയമവിരുദ്ധമായി പരിശോധിച്ച ജില്ലാ പ്രിന്സിപ്പള് സെഷന്സ് കോടതിയില് കൗസര് എടപ്പഗത്ത് ജഡ്ജി ആയിരുന്നു. വസ്തുത പരിശോധനാ റിപ്പോര്ട്ടില് ജസ്റ്റിസ് കൗസര് എടപ്പഗത്തിന് എതിരെ ഉദ്യോഗസ്ഥന്റെ മൊഴിയുണ്ടായിരുന്നു.
കോടതി മേല്നോട്ടത്തില് പുതിയ അന്വേഷണം വേണമെന്നായിരുന്നു അതിജീവിത ആവശ്യപ്പെട്ടത്. ദൃശ്യങ്ങള് ചോര്ന്നതുമായി ബന്ധപ്പെട്ട കേസ് അട്ടിമറിക്കാന് ബോധപൂര്വ്വമായ ശ്രമങ്ങള് നടന്നിട്ടുണ്ടെന്നും അതിജീവിത പറഞ്ഞിരുന്നു. സുപ്രീം കോടതിയിലെ പ്രമുഖ അഭിഭാഷകയായ വൃന്ദ ഗ്രോവര് വഴിയായിരുന്നു അതിജീവിത പുതിയ ഹര്ജി ഫയല് ചെയ്തത്